Мерц повика на итна акција поради хаосот во Сеута: Шпанија и Мароко мора да ја спречат нелегалната миграција

Германскиот канцелар Фридрих Мерц денес ги повика Шпанија и Мароко да преземат решителни мерки за да ја стават под контрола мигрантската криза во Сеута, пренесе „Еуроњуз“.

„Заштитата на надворешните граници на Европската Унија е клучна за борбата против нелегалната миграција. Јасно очекувам сите земји-членки на ЕУ да ја исполнат оваа обврска. Во контакт сме со шпанската влада за ова прашање“, рече Мерц во соопштение објавено на веб-страницата на германската влада.

Тој додаде дека Шпанија сака и мора да ја стави ситуацијата во Сеута под контрола што е можно поскоро.

„Затоа ја поздравувам намерата на Шпанија да не дозволи нелегални мигранти да влезат на европскиот континент. Исто така, очекуваме Мароко веднаш да ги врати нелегалните мигранти“, рече Мерц.

Тој додаде дека е добро што Европската комисија и комесарот за внатрешни работи и миграција Магнус Брунер дале поддршка во овој поглед.

„Регулативата за враќање на мигрантите, усвоена во јуни, сега мора веднаш и целосно да се спроведе“, заклучи Мерц.

Шпанското Министерство за внатрешни работи претходно денес соопшти дека, според прелиминарните проценки, околу 49.000 мигранти влегле во Сеута по море и копно од Мароко во последните 24 часа.

Иако и Шпанија и Мароко ги засилија безбедносните мерки од утрово, илјадници луѓе сè уште се обидуваат да ја преминат границата, а бројот на мигранти кои загинале во тој процес се искачи на 27, објавија шпанските медиуми.