Меланија Трамп домаќин на претставниците на Русија и Украина во Белата куќа: Иницираниот дијалог меѓу двете завојувани страни е нејзина лична заслуга

Првата дама на САД, Меланија Трамп, во четврток во Белата куќа ќе биде домаќин на претставници од Русија и Украина, соопшти Кабинетот на претседателот на САД, опишувајќи го настанот како „извонреден момент во американската историја“.

Според соопштението, „г-ѓа Трамп лично иницираше дијалог меѓу двете завојувани страни и успешно обезбеди прекин на огнот во Олешки и околниот регион Керсон“.

„Ова достигнување претставува дипломатска иницијатива без преседан, покрената од една американска прва дама“, истакнаа од Белата куќа.

Не беше прецизирано кои претставници од Русија и Украина ќе допатуваат во Вашингтон за оваа пригода.

На Меланија Трамп официјално ѝ се припишува заслугата за посредување во привремениот прекин на огнот во Олешки, град кој моментално е под руска окупација. Прекинот на огнот траеше од 27 октомври до 1 ноември, овозможувајќи евакуација на речиси 800 цивили.

Извештаи од парискиот весник „Ле Монд“ (Le Monde) и извори на кои се повикува порталот „Медуза“ (Meduza) укажуваат на тоа дека оваа мисија била подготвувана повеќе од четири месеци, а за неа директно преговарале руската разузнавачка служба (ГРУ) и украинската разузнавачка агенција (ХУР), со вклученост на комесарите за човекови права од Русија и Украина – Јана Лантратова и Дмитро Лубинец, пренесе „Бета“.