Македонската сликарка Сања Чулаковска во четвртфиналето на престижниот американски натпревар „Народен уметник“

Македонската ликовна уметница, сликар и конзерватор-реставратор, Сања Чулаковска, се пласираше во четвртфиналето на престижниот американски натпревар „Народен уметник 2026“ (The People’s Artist), во конкуренција од повеќе од 180.000 уметници од САД и Канада.

Чулаковска е дипломиран ликовен уметник и повеќе од 20 години работеше како конзерватор и реставратор во Музејот на град Скопје, каде што учествуваше во заштита и конзервација на значајни дела од македонското културно наследство. Во 2021 година се пресели во Соединетите Американски Држави, каде што продолжува активно да твори и да ја гради својата меѓународна кариера.

Денес живее и работи во Флорида, каде што создава современа апстрактна уметност, организира ликовни работилници, изложува во галерии и соработува со ентериер дизајнери во опремување на луксузни домови и апартмани.

Нејзината уметност е препознатлива по силниот емоционален израз, слободниот гест и богатите слоеви на боја кои создаваат динамични и впечатливи композиции. Преку современиот апстрактен пристап, Чулаковска истражува теми поврзани со емоциите, сеќавањата, движењето и светлината.

Со пласманот во четвртфиналето на „Народен уметник 2026“, таа е една од ретките уметници од Балканот што стигнаа до оваа фаза, а воедно и единствена Македонка во натпреварот.

„За мене, ова е повеќе од натпревар. Голема чест е што имам можност да ја претставувам Македонија пред меѓународната публика и да покажам дека нашите уметници можат рамноправно да се натпреваруваат на светската сцена“, вели Чулаковска.

Гласањето продолжува, а сите што сакаат да ја поддржат Чулаковска, можат да гласаат на следниов линк https://peoplesartist.org/2026/sanja-chulakovska