Ако користите Виндоус 11, проверете која верзија ја имате пред 13 октомври. На тој датум, Microsoft ја прекинува поддршката за Windows 11 верзија 24H2 на компјутерите со изданијата Home и Pro, што значи дека овие уреди повеќе нема да добиваат редовни безбедносни ажурирања.
Вашиот компјутер нема да се исклучи или наеднаш да престане да работи поради ова. Проблемот е што верзијата 24H2 повеќе нема да добива нови заштити од безбедносни закани, поправки за познати проблеми или други редовни ажурирања.
Овој краен рок се однесува на Windows 11 Home и Pro. Изданијата Ентерпрајс и Еџјукешн имаат значително подолг период на поддршка и остануваат поддржани за верзијата 24H2 до октомври 2027 година.
Како да проверите која верзија на Виндоус ја имате
Проверката трае само неколку секунди. Притиснете Windows + I, отворете System (Систем), а потоа изберете About (За).
Во делот „Windows specifications“ (Спецификации за Windows), побарајте ја ставката „Version“ (Верзија). Ако пишува 24H2 и користите издание Home или Pro, вашиот компјутер е меѓу оние на кои влијае крајниот рок од 13 октомври.
„Мајкрософт“ веќе објави понови верзии на Windows 11. Верзијата 26H2 стана општо достапна на 29 септември 2026 година, додека поддржана е и верзијата 25H2, со краен рок до октомври 2027 година за изданијата Home и Pro.
Што треба да направите
Ако сè уште ја користите верзијата 24H2, отворете Settings > Windows Update (Поставки > Windows ажурирање) и проверете дали ви се нуди понова верзија на системот.
„Мајкрософт“ моментално ја дистрибуира верзијата Windows 11 26H2, а ажурирањето е достапно за компатибилни компјутери. Компанијата наведува дека корисниците кои ја вклучиле опцијата „Get the latest updates as soon as they’re available“ (Добивај ги најновите ажурирања штом ќе бидат достапни) можат да ја добијат новата верзија штом таа ќе биде подготвена за нивниот уред.
Доколку верзијата 26H2 сè уште не ви е понудена, „Мајкорсофт“ сè уште ја наведува 25H2 како поддржана верзија за корисниците на изданијата Home и Pro, при што поддршката трае до октомври 2027 година.
Нема потреба од паника, но нема ниту причина непотребно да останете на верзијата 24H2. Остануваат уште само неколку дена поддршка, па затоа најважниот чекор е да проверите која верзија моментално се користи на вашиот компјутер, пренесува „Телеграф“.
