Кремљ: Европа не може да се договори кој ќе ја претставува

Кремљ соопшти дека европските земји сè уште не успеале да се договорат кој ќе ги претставува во идните разговори за безбедноста на континентот – разговори што се сметаат за дел од можното решение за ситуацијата во Украина – пренесува Ројтерс.

Оваа изјава доаѓа по состанокот во Брисел на кој учествуваа претставници од Соединетите Држави, Украина, НАТО и европските партнери. Разговорите беа фокусирани на безбедносните гаранции за Украина и на пошироката безбедносна архитектура на Европа.

Во меѓувреме, американскиот претседател Доналд Трамп вчера зборуваше за „голем договор“ во кој „би можела да биде вклучена цела Европа“.

Портпаролот на Кремљ, Дмитриј Песков, изјави дека Европа ќе треба да биде вклучена во преговорите, но нагласи дека европските нации сè уште немаат заземено заеднички став.

„Не сме добиле никакви предлози од европска страна. Не сме запознаени со такви предлози“, им рече Песков на новинарите.

Тој објасни дека прашањето за идниот безбедносен поредок во Европа неизбежно ќе се појави штом ќе започнат разговорите за взаемни безбедносни гаранции меѓу Русија и Украина.

„Секако, во одредена фаза, тоа нема да биде возможно без Европејците“, додаде тој.

Песков повтори дека разговорите со европските претставници ќе бидат неопходни, но ја критикуваше нивната досегашна неодлучност.

„Поради тоа, дијалогот со Европејците ќе биде од суштинско значење. Сепак, како што гледаме, тие сè уште не успеале да се договорат дури ни за тоа кој би зборувал во нивно име. Од таа страна гледаме само долготрајна неодлучност и недостаток на подготвеност“, заклучи Песков.