Крај на бесплатниот Инстаграм

Инстаграм, кој досега беше бесплатен за користење, тестира нова претплата наречена Плус. Оваа опција им дава на корисниците пристап до ексклузивни алатки за уредување и следење на „приказни“ (story,) а првиот месец од користењето е бесплатен за да се запознаат заинтересираните страни со новите функции.

Тестот моментално ги вклучува Мексико, Јапонија и Филипините, додека се очекува да се прошири и во други региони. Целта е да се зголеми ангажманот на корисниците преку платената верзија и да се понудат дополнителни опции за оние кои сакаат повеќе од стандардните функции.

Инстаграм Плус ја носи можноста да следите кој повторно ја видел вашата „приказна“ и да пребарувате во листата на гледачи по име. Исто така, времетраењето на приказните е продолжено од 24 на 48 часа, а можно е да се создадат повеќе групи со различен пристап до приватни „приказни“.

Претплатниците можат да испраќаат посебни срца како знак на поддршка за нивните омилени креатори. Цената се движи од еден до два долари месечно, во зависност од земјата, додека основните функции на апликацијата остануваат бесплатни за сите корисници.

Досега, Инстаграм се потпираше главно на приходите од рекламирање, но претплатата Plus означува нов модел на монетизација. Компанијата тестира различни функции за да утврди што корисниците сакаат и за што се подготвени да платат, дополнително развивајќи го својот екосистем на алатки.

Експертите истакнуваат дека корисниците ќе мора да ги следат известувањата и поставките на профилот, бидејќи опцијата за претплата може да се појави ненадејно. Овој потег покажува дека социјалната мрежа влегува во нова фаза каде што дополнителните функции стануваат платени.

Што значи ова за редовните корисници?

Сите основни алатки остануваат бесплатни, така што оние кои не сакаат да плаќаат не го губат пристапот до стандардните функции. Сепак, оние кои сакаат подетални информации за своите следбеници и напредни опции за уредување сега имаат можност да платат за Instagram Plus.

Се очекува Meta да продолжи да ја прилагодува функционалноста за време на тестирањето, па затоа е можно претплатата да добие повеќе нови функции или променета цена за различни региони во иднина.