Крај на 150-годишна традиција: Кочиите со коњи ќе бидат забранети низ Централ парк во Њујорк – а, што ќе се случи со кочијашите?!

Кочиите со коњи, кои повеќе од 150 години се движат низ њујоршкиот Централ парк, наскоро ќе бидат забранети во овој голем американски град – со што се става крај на традицијата на која долго време се спротивставуваа активистите за правата на животните.

Кочијашите не знаат што ќе се случи понатаму.

„Никој не излегува со соодветен одговор, бидејќи таков одговор едноставно не постои. Ако останам без работа, како ќе се грижам за моите коњи?“ – прашува Алекс Лосон (28), кочијаш од Квинс, кој пораснал опкружен со коњи, а претходно работел и како инструктор по јавање.

Вчера, Градскиот совет на Њујорк усвои пропис со кој се забранува употребата на кочии со коњи до јуни 2028 година. Оваа одлука доаѓа по инцидентот што се случи минатата пролет, во кој животот го загуби една млада туристка.

Сепак, прашањето што се појавува секојпат кога ќе се спомене укинувањето на оваа дејност, останува неодговорено: што ќе биде со луѓето кои ќе останат без средства за живот?

Одлуката на градските власти на Њујорк наложува градоначалникот до април следната година да изготви план за поддршка на повеќе од 150-те кочијаши и други лица вклучени во овој бизнис. Иако за нив мора да се најде ново вработување, одредбите од градскиот пропис се премногу нејасни и не утврдуваат конкретни заштитни механизми за оние што ќе останат без работа. Наместо тоа, од Градскиот совет се бара да развие програма која вклучува препораки за вработување, советување за отпуштените лица и можности за едукација; исто така, градската администрација е овластена да разгледа можност за исплата на обештетување за оние што ќе ги загубат своите работни места.

Според градската управа на Њујорк, Кабинетот на градоначалникот веќе работи на програма за транзиција на работната сила и започнал разговори во врска со потенцијалното обештетување.

„Градоначалникот ќе го потпише овој пропис, а администрацијата секојдневно работи на тоа да овозможи спроведување на оваа мерка [постепено укинување на кочиите со коњи], истовремено обезбедувајќи најсилна можна заштита за сопствениците и работниците во оваа индустрија“, изјави портпарол на градоначалникот.

Медет Фидан, поранешен таксист кој го заменил своето возило со уздите на кочија откако апликациите за превоз ја трансформираа такси-индустријата, смета дека тој – како и другите како него – се цел на напад.

„Мислам дека градот ни создава огромен хаос“, вели 56-годишниот Фидан. „Ќе ги изгубиме нашите работни места, нашите работни простори, нашата егзистенција.“

Членката на Градскиот совет, Џули Менин, која ја иницираше забраната, „ќе остане вклучена во процесот на транзиција“, изјави портпаролот, додавајќи дека законската регулатива има за цел да го реши долгогодишното прашање што ќе биде со кочијашите откако ќе останат без работа, истовремено поставувајќи цврст краен рок за дејствување. „Овие работници заслужуваат да бидат заштитени“, вели Менин, која смета дека за коњите веќе нема место меѓу пешаците, велосипедистите, луѓето што шетаат кучиња и збунетите туристи во Централ парк.

Синдикатот што ги застапува кочијашите најави дека ќе поднесе тужба против градот „штом ќе се исуши мастилото“ на законот.

Бетси Смит, раководителка на „Централ парк консерванси“ (Central Park Conservancy) – непрофитната организација што управува со паркот – го поздрави усвојувањето на законот.

„Во денешно време, кочиите со коњи претставуваат сериозен – па дури и смртоносен – безбедносен ризик за посетителите на паркот, за кочијашите, како и за самите коњи“, напиша таа во соопштение.

Претседателот на САД, Доналд Трамп – роден Њујорчанец чија „Трамп кула“ (Trump Tower) се наоѓа на само чекор од Централ парк – изрази жалење поради забраната, опишувајќи го возењето со кочија како „класично њујоршко искуство“.

„Тоа беше одлична традиција. Уште едно парче историја замина. Ќе недостасува!“ напиша Трамп на социјалните мрежи.

Двајца од претходниците на Де Блазио на градоначалничката функција исто така повикуваа на укинување на кочиите со коњи, но ниту еден од нив не успеа во тоа.

На поранешниот градоначалник Бил де Блазио му се спротивставија синдикатот и голема медиумска кампања во која учествуваше актерот Лијам Нисон. Ерик Адамс, директниот наследник на де Блазио, предложи забрана кон крајот на својот мандат, но предлогот не беше усвоен. Потоа, 18-годишниот индиски турист Романч Махаџан почина откако скокна од кочија за време на неконтролирано возење. Се чини дека неговата смрт е првиот инцидент со кочија во Централ Парк, откако таму започнале ваквите возења.

Семејството Махаџан лично апелираше до градските власти да стават крај на оваа практика. Неговиот вујко, Гаурав Махаџан, вчера го поздрави предложениот закон, изјавувајќи: „Конечно дојде моментот за правда“.

Сопствениците на кочии изразија сочувство за Махаџан и неговото семејство, но тврдат дека се неправедно цел на критики поради една несреќа.

„Ништо не се презема во врска со алтернативно вработување или продолжување на нашата дејност“, изјави Кристина Хансен, која долго време се занимава со оваа дејност и е портпарол на секторот, додавајќи: „Кој ќе ми ја плати киријата?“, пренесува „Бета“.