Кенија го потврди првиот увезен случај на ебола од Конго – пациентот починал во Најроби

Кенискиот министер за здравство, Аден Дуале, соопшти дека еден кениски државјанин – кој пристигнал во саботата од Конго преку Уганда и бил позитивен на вирусот ебола – починал синоќа во изолација во болница во Најроби, каде што се лекувал.

Здравствените власти го подигнаа нивото на подготвеност низ цела Кенија поради можноста за појава на нови случаи.
Дуале изјави дека се идентификувани 28 лица кои биле во контакт со починатиот, вклучувајќи членови на семејството и здравствени работници кои се грижеле за него; исто така, во тек е потрага по 23 патници кои патувале на истиот лет од Уганда.

Лицата кои биле во контакт со заболениот ќе останат во изолација 21 ден и ќе бидат пуштени дури откако тестовите ќе потврдат дека не се заразени со вирусот, изјави претставникот на Министерството за здравство, Патрик Амот.

Пациентот ќе биде погребан во рок од 24 часа, во согласност со препорачаните протоколи за заштита на јавното здравје.

Кенија е четвртата земја што регистрирала случај на ебола за време на тековната епидемија, која беше прогласена во средината на мај во источниот дел на Конго.

Дваесет случаи се регистрирани во Уганда, а еден во Франција.

Од крајот на август – кога Уганда прогласи крај на епидемијата на своја територија – немаше активни случаи на ебола надвор од Конго, сè досега, кога Кенија го пријави овој случај.

Оваа епидемија на ебола се шири побрзо од која било друга во историјата на болеста. Светската здравствена организација предупреди дека ова би можело да стане најсмртоносното жариште досега, бидејќи вирусот се шири побрзо отколку што здравствените служби можат да ги идентификуваат заразените лица и да ја спречат епидемијата.

Епидемијата е предизвикана од реткиот вирус „Бундибуџо“ (Bundibugyo), за кој не постои ниту одобрена вакцина, ниту третман. Во тек се испитувања на вакцини и потенцијални третмани во провинцијата Итури во Конго, која е епицентар на епидемијата, пренесе „Бета“.