Катастрофален пожар во германска болница: Двајца мртви, 34 се повредени

Најмалку две лица загинаа, а 34 се повредени во голем пожар што избувна рано утрово во болница во северниот германски град Лудвигслуст.

Според германскиот магазин „Фокус“, пожарот го зафатил покривот на болницата, а пациентите и медицинскиот персонал се евакуираат. Ситуацијата на терен е исклучително драматична. Пациентите се евакуираат во инвалидски колички или директно на болнички кревети, а привремено се згрижуваат на тротоарот и тревникот пред зградата.

Првичните информации укажуваат дека пожарот избувнал во една од болничките соби, по што брзо се проширил на остатокот од објектот. Пожарот бил пријавен во надлежните служби во 4:28 часот наутро. Клиниката има 160 кревети, а во моментот на пожарот таму престојувале 82 пациенти.

Портпаролката на округот Лудвигслуст-Пархим потврди за медиумите дека двете лица што загинале биле пациенти во оваа болница.

Сцените од местото на несреќата се драматични. Луѓето седат на тревникот завиткани во термални ќебиња додека персоналот на клиниката се обидува да им помогне.

Некои пациенти кои можат да одат излегоа сами, додека други седат на клупите пред клиниката, многумина со крпи префрлени преку рамената. Целиот комплекс е обвиен во густ чад.

Бројни противпожарни и спасувачки екипи се распоредени на местото на настанот за да го гаснат пожарот. Полицијата ги повика возачите и жителите да ја избегнуваат областа за да им дозволат на возилата за итни случаи да пристапат до неа.