Калас: Укинувањето на американските санкции за рускиот дизел ја разгорува војната против Украина

Високиот претставник на Европската унија (ЕУ) за надворешни работи и безбедносна политика, Каја Калас, денеска изјави дека укинувањето на американските санкции за рускиот дизел – со што на Москва ѝ се овозможува да ги снабдува САД и светот – придонесува за поттикнување на војната што Кремљ ја води против Украина.

„Суспендирањето на санкциите за рускиот дизел ѝ обезбедува на Москва дополнителни приходи за водење војна. Сега не е време за попуштање на притисокот врз Русија, а Европа нема да го стори тоа“, напиша Каја Калас на социјалните мрежи.

Германската влада објави дека ќе ги задржи санкциите против Русија поради војната во Украина, иако американскиот претседател Доналд Трамп синоќа соопшти дека неговата администрација привремено ги укинала американските санкции за руското дизел гориво, откако Русија ветила дека ќе го снабдува со ова гориво пазарот во САД и во светот.

„Сојузната влада ја прими к знаење одлуката на САД во врска со испораките на руски дизел“, кратко изјави портпаролот на германската влада, Штефан Корнелиус, додавајќи дека поддршката на Германија за Украина останува непроменета и дека ќе продолжат дипломатските напори за изнаоѓање решение за војната меѓу Русија и Украина.

Синоќа, Трамп објави договор, кој предизвика големи контроверзии, со рускиот претседател Владимир Путин во врска со испораката на милиони тони дизел гориво за американскиот пазар и за остатокот од светот. Таа еднострана одлука предизвика остри критики од американските законодавци и бурни реакции од украинскиот претседател Володимир Зеленски.

По телефонскиот разговор со Путин, Трамп објави дека Русија веднаш ќе започне со испорака на дизел гориво за да помогне во ублажувањето на вртоглаво високите цени во САД.

Повеќе од 300.000 метрички тони (приближно 2,25 милиони барели) руски дизел веднаш ќе бидат пуштени на американскиот и на глобалниот пазар. За ноември се планирани дополнителни 500.000 тони, а кратко потоа и уште еден милион тони.

Договорот предвидува уште три милиони тони „во блиска иднина“, со што почетниот пакет за испорака би достигнал над четири милиони метрички тони.

За да се олеснат трансакциите, Министерството за финансии на САД издаде општа дозвола со која привремено се укинуваат санкциите за извоз на руски дизел. Администрацијата на Доналд Трамп е под огромен домашен притисок да ги намали цените на горивата, кои вртоглаво пораснаа пред претстојните ноемвриски избори за Конгресот на САД – т.н. „избори на средината на мандатот“ – особено поради зголемените трошоци што ги погодуваат американските земјоделци, сточари, транспортни компании и самите возачи на камиони.

Енергетските пазари се исклучително нестабилни поради војната со Иран, која доведе до затворање на стратешки виталниот Ормуски Теснец, како и поради постојаните напади со украински беспилотни летала врз руската енергетска инфраструктура. Извештаите укажуваат дека Трамп постигнал договор со Путин во врска со дизелот, откако украинскиот претседател Зеленски се спротивставил на барањата на САД да се прекинат нападите со беспилотни летала врз руските рафинерии за нафта.

Најавата на Трамп претставува драстична промена во политиката и доаѓа само три недели откако тој го потпиша законот за санкции против Русија и Иран, чија цел беше заострување на енергетските санкции кон Москва.

Претседателот Зеленски остро го критикуваше потегот на Трамп на социјалните мрежи и во интервјуа, опишувајќи го укинувањето на санкциите како „роденденски подарок за Путин“, кој оваа недела наполни 74 години. Зеленски изјави дека договорот претставува „инвестиција во војна што мора да заврши, а не да се продолжува“.

Лидерот на демократите во Сенатот, Чак Шумер, и други високи функционери издадоа заеднички изјави во кои остро го критикуваа договорот, оценувајќи го како неуспех во заштитата на Америка од нејзините противници и нагласувајќи дека тој целосно го поткопува неодамна усвоениот двопартиски закон за санкции против Русија и Иран.

Дури и некои членови на сопствената партија на Трамп го критикуваа потегот, при што републиканските пратеници тврдеа дека поддршката за воената економија на Путин ја поткопува моралната позиција на Западот во однос на војната во Украина.