Израел брише сè што не е еврејско во Ерусалим: Палестинците мораат сами да си ги срушат куќите за да направат место за тематски парк

Во подножјето на стрмна и густо населена долина, веднаш под ѕидините на Стариот град во Ерусалим, последниве недели земјата се тресе од пневматски чекани и од булдожери. Вообичаено, во булдожерите се работници на државата и на општините, но во населбата Ал Бустан, во сенката на џамијата „Ал Акса“ од 11 век, бучавата ја создаваат Палестинците што ги уриваат сопствените семејни домови, пишува британскиот весник „Гардијан“.

Џалал ал Тавил вели дека му е многу тешко да ја сруши куќата што ја изградил неговиот татко, на местото на куќата од неговиот дедо, но Општината Ерусалим му рекла дека ќе го чини 280.000 шекели (72.000 фунти) ако ја срушат нејзините работници. Ако ја сруши сам, ќе потроши помалку од една десеттина од таа сума. Абу Дијаб, пак, како што пишува „Гардијан“, сè уште ја отплаќа казната од 43.000 шекели (речиси 13.000 евра) што му ја изрекла општината за да ги покрие трошоците за уривање на неговиот дом. Тој плаќа по 4.000 шекели (1.193 евра) месечно и вели дека морал да плати и 9.000 шекели (2.691 евро) за сендвичите што ги јадела полицијата додека ја вршела повеќедневната операција.

Повеќе од 57 куќи во Ал Бустан, дел од пошироката населба Силван во источен Ерусалим, се срушени во последните две години, а најмалку осум се закажани за рушење во наредните недели. На тоа место треба да се изгради библиски тематски парк наречен „Кралска градина“, наводно на местото каде што пред три милениуми се одморал кралот Соломон. Паркот е замислен како дел од се поширокиот, главно, доселенички археолошки проект, насочен исклучиво кон еврејското минато на Ерусалим и сконцентриран околу она што се нарекува градот на Давид – и покрај ставот на многу израелски археолози дека видливите остатоци доаѓаат од други епохи, пред и по железното време на владеењето на кралот Давид.

– Израел не е подготвен да ја признае двонационалната, мултиетничка, мултикултурна реалност на Ерусалим и ги брише, пред сè, Палестинците, но, всушност, сè што не е еврејско, а потоа го покрива со овие дизнифицирани бесмислици – вели Авив Татарски, виш истражувач во „Ир Амим“.

Сенката на тематскиот парк „Кралска градина“ се надвисна над Ал Бустан пред речиси две децении, но булдожерите беа попречувани од палестинскиот отпор, во комбинација со меѓународното противење и одредена амбивалентност во израелската политика. Сите три пречки паднаа по нападот на Хамас на 7 октомври 2023 година, војната во Газа што следуваше и враќањето на Доналд Трамп на претседателската функција во САД.

Општината Ерусалим не одговорила на барањето на „Гардијан“ за коментар, но изјавила за порталот „+972“ дека планираниот тематски парк „се гради за доброто на сите жители на градот“ и дека куќите во Ал Бустан се изградени нелегално. Општината, исто така, објави дека „со години се обидува да најде решение за жителите што би вклучувало алтернатива за домување, но тие не покажале сериозен интерес за постигнување решение“. Но, Палестинците велат дека општината рутински им ги одбива градежните дозволи на Палестинците, додека рутински им ги доделува на израелските Евреи.