Во истрагата за сериозната поморска несреќа во близина на Сплит, во која загинаа четворица чешки државјани, се појавија нови неофицијални информации. Според нив, во моментот кога катамаранот се судрил со едрилицата, капетанот не бил на кормилото, туку еден од повредените патници, пишува порталот „Далматински“.
Трагедијата се случила вчера наутро во каналот помеѓу Брач и Шолта, а истрагата за катамаранот Крило Еклипс продолжила денес.
Во несреќата загинаа четири лица, додека четворица беа спасени и пренесени во сплитската болница. Сите се чешки државјани. Капетанот и двајца патници беа пуштени од КБЦ по прегледот, додека една жена е на лекување поради фрактура на пршлен.
Се очекува полицијата да ги испраша сите преживеани од едрилицата. Капетанот, првиот офицер и кормиларот на катамаранот исто така ќе дадат изјави, како и патниците на катамаранот кои можат да имаат корисни информации за околностите на судирот, пренесува хрватски „Индекс“.
Важен дел од истрагата би можеле да бидат и француските државјани кои биле на блиска едрилица во времето на несреќата. Неофицијално е познато дека тие го снимиле самиот момент на судирот, а оваа снимка би можела да им биде од клучна помош на истражителите во расветлувањето на настанот.
Двата брода се движеле во ист правец, кон Хвар. Едрилицата пловела од Трогир и била на мотор, додека брзиот патнички катамаран Крило Еклипс пловел од Сплит. Штетата предизвикана од судирот е видлива на предниот и десниот труп на катамаранот.
Според неофицијалните информации од Далматинскиот портал, едрилицата наводно го сменила курсот во последен момент. Во времето на несреќата, првиот офицер и кормиларот биле на мостот на катамаранот.
Како што е вообичаено во вакви ситуации, наредени се примероци од крв и урина од чешкиот капетан, командантот и првиот офицер на катамаранот за токсиколошка анализа. Наредена е и обдукција на телата на починатите.
Ќе се спроведе и вештачење за да се утврдат точните причини за поморската несреќа. Едрилицата, која потона на длабочина од повеќе од 50 метри, ќе биде извлечена за детален преглед.
