Историја стара 1.700 години повторно видлива! Нискиот водостој на Дунав го откри мостот на римскиот цар Константин!

Екстремно ниските нивоа на водата на Дунав во Бугарија открија делови од темелите на древниот мост на римскиот император Константин I, од четвртиот век од н.е., и им дадоа на бугарските археолози ретка можност да документираат едно од најимпресивните инженерски достигнувања на Римското Царство, соопшти регионалниот историски музеј во Плевен.

Претставник на музејот во Плевен, Павел Попов, рече дека „за археолозите, овие моменти се исклучително вредни, бидејќи природата накратко открива објект кој поголемиот дел од времето е скриен под Дунав“, објави Ројтерс.

– Ова ни дава ретка можност да го набљудуваме, документираме и проучуваме во неговата вистинска средина – рече Попов.

На 5 јули 328 година од нашата ера, римскиот император Константин I лично го отворил и осветил Константиновиот мост, кој бил најголемиот и најпознат камен мост на Дунав, кој го поврзувал античкиот град Улпија Аскул во северна Бугарија со Сучидава во денешна Романија.

Со должина од 2,5 километри и ширина од 5,7 метри, тој бил најголемиот речен мост во антиката, но се користел само околу 27 години и бил уништен за време на варварската инвазија на Хуните во 355 година од нашата ера.

Во вторник, тим од Музејот во Плевен извршил аерофотографирање и документирање на видливите остатоци од мостот, во близина на селото Гиген во северна Бугарија.

Истражувачите користеле дронови за да ги мапираат и фотографираат остатоците од мостот, кои се видливи поради нискиот водостој на Дунав.