По разорната серија земјотреси по должината на карипскиот брег на Венецуела, земјата се соочува со најлошата сеизмичка катастрофа во последните повеќе од 125 години, со најмалку 1.700 мртви и десетици илјади исчезнати. Спасувачките екипи влегуваат во последната фаза од потрагата по преживеани во критичниот период од 72 часа. Светските медиуми известуваат, повикувајќи се на експерти, дека по тој период шансите за пронаоѓање преживеани се драстично намалени и дека потрагата се префрла на извлекување тела.
Имено, и покрај меѓународната помош и распоредувањето на илјадници спасувачи, потрагата по исчезнатите сè уште трае во погодените области меѓу урнатините на срушените згради. Спасувачките екипи со кучиња трагачи продолжуваат да бараат преживеани меѓу урнатините.
Сепак, неодамнешните вести даваат надеж и покрај фактот дека сега е статистички речиси невозможно да се пронајдат преживеани. Татко и син беа спасени од урнатините на срушена зграда во венецуелската држава Ла Гваира. Спасувањето следеше по 12-часовна сложена операција во која екипите користеа специјализирани камери за пребарување.
Член на француската цивилна заштита изјави дека и таткото и синот се многу слаби, откако поминале четири дена под урнатините, но дека е добра вест што ја преживеале катастрофата.
Критичниот период за спасување од 72 часа истече, а експертите велат дека со секој час, надежта за пронаоѓање преживеани меѓу урнатините се намалува. Се проценува дека милиони луѓе се без санитарни услови и основни потреби.
Спасувачките екипи од САД, Мексико и други земји се обидуваат да спасат луѓе, додека очајните жители рачно копаат низ урнатините за да ги пронајдат роднините затрупани во урнатините.
Околу 774 згради беа сериозно оштетени во серијата земјотреси со јачина од 7,2 и 7,5 степени што ги погодија во средата вечерта, вклучувајќи 189 целосно урнати згради, изјави претседателот на Националното собрание Хорхе Родригез.
Во една од најтешко погодените области, крајбрежниот град Ла Гваира, Хектор Агилера отиде да бара четири члена на семејството закопани во урнатините.
„Немаме поддршка да го извлечеме нашето семејство, не можеме сами да го направиме тоа. Тие се закопани таму, знаеме дека се мртви, но ние сме тука“, рече тој, а пренесе „Еуроњуз“.
Во населбата Сан Бернардино во Каракас, волонтери се искачија на срушена зграда, користејќи дупчалки за кршење бетон и формирајќи линии за рачно отстранување на урнатините. Во Чако, друг дел од главниот град, големи електронски екрани на зграда што обично се користи за рекламирање ги прикажуваа лицата на исчезнатите во обид да помогнат во нивното пронаоѓање.
Во меѓувреме, додека продолжуваат спасувачките напори, грабежи се пријавени и во Ла Гваира, каде што голем дел од областа сега е во урнатини. Аптеки, супермаркети и други објекти се ограбени, велат жителите, а некои го критикуваат бавниот и несоодветен одговор од властите.
Погребните служби се „преоптоварени“
Во меѓувреме, волонтерите даваат советување, а погребалните служби донираат ковчези. Телата пристигнуваат на мотоцикли, на задниот дел од автомобили или на задниот дел од камиони, пишува „Гардијан“.
Студентката по психологија, која им дава емоционална поддршка на ожалостените семејства во мртовечницата Бело Монте во главниот град на Венецуела, Каракас, Камила Родригез, за британскиот весник изјави дека атмосферата по земјотресот била многу лоша.
„Целата улица беше преполна со луѓе кои пристигнуваа со починати роднини“, рече таа.
Во меѓувреме, британскиот весник објавува дека на улиците расте гневот поради она што многумина го сметаат за бавен одговор од владата неподготвена за криза од ваков обем и начинот на кој многумина се чувствуваат напуштени на својата судбина во часовите по катастрофата.
Надежта што останува, помошта и економското влијание
Од друга страна, привремената претседателка на Венецуела, Делси Родригез, ги пофали спасувачите кои сè уште извлекуваат преживеани од урнатините.
„Денес спасивме луѓе кои се уште се живи и затоа овие напори нема да престанат“, рече таа.
САД, исто така, испратија хеликоптери со помош, а уште 230 американски воени лица доаѓаат за да го прошират капацитетот на аеродромот и повторно да го отворат пристаништето, соопшти Јужната команда на САД. Американците претходно испратија тим за одговор на катастрофи од 250 лица.
Но, шансите за спасување на преживеани се намалија. Спасител од Ел Салвадор, кој не сакаше да го каже своето име, рече дека е голем благослов да се најде некој жив сега.
„Во овој момент, веројатно се мртви тела. Фала му на Бога, можеби сè уште можеме да најдеме некој жив“, рече тој кратко.
Очајот избувна во некои места каде што жителите велат дека властите не направиле доволно за да ги спасат жртвите од земјотресот.
„Земјата има потреба од вас. Спуштете го оружјето“, им извика еден човек на војниците во округот Танагуарена во тешко погодената држава Ла Гваира, повикувајќи ги да земат мотики и лопати наместо оружје.
Соочена со гневот на јавноста поради одговорот на локалните власти, Родригез им се заблагодари на другите земји за нивната помош. Дваесет и четири земји испратија 521 тони залихи, 86 единици кучиња обучени за лоцирање на луѓе заробени под урнатините и повеќе од 2.700 спасувачи.
Агенцијата на ОН за миграција соопшти дека, врз основа на податоците за населението и штетите, до 6,76 милиони луѓе би можеле да бидат погодени и ќе им треба засолниште, вода, санитација, здравствена заштита и основна помош.
Најлошите земјотреси во повеќе од еден век во Венецуела се случија по повеќе од една деценија економски колапс во земјата богата со нафта. Кризата ги опустоши болниците и јавните служби, принудувајќи милиони луѓе да ја напуштат земјата.
Обединетите нации проценија материјална штета од 6,7 милијарди долари (5,8 милијарди евра), што е еквивалентно на шест проценти од БДП на Венецуела.
