Иран не е подготвен да одржи нова рунда тет-а-тет разговори со американски претставници, изјави денес иранскиот заменик-министер за надворешни работи Саид Хатибзаде, велејќи дека Иран нема намера да го предаде сопствениот збогатен ураниум на САД.
„Можам да ви кажам дека нема да се испрати збогатен ураниум во САД. Тоа не е можно. Можам да ве уверам дека иако сме подготвени да се справиме со сè што е на маса, нема да прифатиме работи што се непотребни“, рече тој, пренесува АП.
Како што изјави, имаше многу размена на пораки и ставови меѓу двете страни, и додаде дека САД остануваат цврсти во својата позиција во врска со барањата што Иран ги смета за прекумерни.
„Сè уште не сме таму каде што можеме да преминеме на вистински состанок бидејќи има прашања за кои Американците сè уште не го напуштиле својот максималистички став“, рече Хатибзаде, додавајќи дека Иран побарал да се финализира „рамковен договор“ пред да се премине на тет-а-тет состанок.
Претходно денес, американскиот претседател Доналд Трамп изјави дека Иран „се преправа дека е малку паметен“, но дека се водат „многу добри разговори“ за прекин на конфликтот на Блискиот Исток.
Кога беше замолен да го коментира потегот на Техеран да ја повлече одлуката за повторно отворање на Ормутскиот теснец, Трамп им рече на новинарите во Белата куќа дека се во тек „многу добри дискусии“. „Тие (разговорите) функционираат навистина добро, се однесуваат малку паметно, како што прават веќе 47 години“, рече Трамп. Тој ги повтори тврдењата дека САД во голема мера ги елиминирале морнарицата, воздухопловните сили и раководството на Иран.
Трамп рече дека Иран „не може да ги уценува САД“. Во конфликтот меѓу САД и Израел против Иран, на сила е двонеделно примирје, кое започна на 8 април. Минатата недела се одржа првата рунда преговори за постигнување траен мир, со посредство на Пакистан, каде што не беше постигнат договор, а беше објавено дека веројатно ќе има продолжување на разговорите.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ