И покрај планот на Трамп за Ормускиот теснец, цената на нафтата сè уште расте

Европските индекси денеска се неизедначени, при што суровата нафта Брент повторно се искачи на над 109 долари за барел, и покрај најавата на американскиот претседател Доналд Трамп дека ќе започне операција за спасување на танкерите блокирани од затворањето на Ормускиот теснец.

Во објава на платформата Truth Social синоќа, Трамп ја објави операцијата „Проект слобода“, чија цел е цивилните бродови од земјите кои не се вклучени во конфликтот меѓу Вашингтон и Техеран да излезат од Ормускиот теснец, за да можат да продолжат со својот бизнис.

Според податоците на берзата во 9:30 часот наутро, цената на суровата нафта се зголеми за 0,93 проценти на 102,931 долари, а на суровата нафта Брент за 0,97 проценти на 109,232 долари.

Во Европа, вниманието на инвеститорите е насочено кон новите PMI индекси за производство, како и кон податоците за инфлацијата во Турција. Неделава се очекуваат и извештаите за заработка на неколку гиганти, меѓу кои HSBC и Shell.

На отворањето на берзата во Амстердам, природниот гас за јуни се тргуваше по цена од 44,9 евра за мегават-час. Додека германскиот DAX бележи благ раст, францускиот CAC 40 и московскиот MOEX се во пад. Лондонската берза денеска не работи поради празник.