Женско тело е пронајдено денес во областа Станиќи во близина на Омиш, а хрватските медиуми јавуваат дека станува збор за 34-годишната Драгана Антешевиќ, државјанка на Босна и Херцеговина која исчезна во четврток додека бегаше од пожар што го зафати подрачјето, објавува „Кликс“.
Официјална потврда на идентитетот се очекува дури по обдукција и ДНК анализа, но хрватските медиуми пишуваат, повикувајќи се на извор близок до истрагата, дека засега нема ништо што укажува дека може да станува збор за некој друг.
Според информациите од Министерството за внатрешни работи, Драгана Антешевиќ е единственото лице кое е пријавено како исчезнато по пожарот во подрачјето. Во еден момент, се барала и 65-годишна жена, но подоцна била пронајдена жива во болница.
„Слободна Далмација“ пишува дека телото е пронајдено недалеку од местото каде што била Драгана со уште две жени кои се обидувале да избегаат од пожарот во автомобил.
Претходно беше објавено дека во возилото биле три жени. Една од нив е тешко повредена во пожарот, додека Драгана исчезнала за време на хаосот. Затоа, потрагата била фокусирана токму на подрачјето околу местото каде што автомобилот последен пат бил виден пред да избега.
Точните околности на нејзината смрт, како и официјалната потврда за нејзиниот идентитет, ќе бидат познати откако ќе бидат завршени сите форензички тестови.
