Голема меѓународна полициска операција, поддржана од „Европол“: Германски ресторани служеле како параван за дејствија на италијанската мафија, запленети дрога и фалсификувани евра

Голема меѓународна полициска операција, поддржана од Европол, разби опасна криминална мрежа поврзана со озлогласената италијанска организација „Камора“. Шест лица беа уапсени за време на рации во Германија, Италија и Шпанија.

Петмина осомничени моментално се во притвор, додека еден е пуштен на слобода со ограничувања наметнати од судот.

Полициски тимови истовремено извршија рации на 16 локации во Штутгарт, германскиот округ Ремс-Мур, Неапол и шпанскиот остров Гран Канарија.

За време на претресите, властите запленија два нелегални пиштоли со муниција, одредени количества дрога, 16 мобилни телефони и уреди за складирање податоци, како и значителни суми фалсификувани банкноти во евра, кои потекнуваат од таканаречената „Група од Неапол“.

Истражителите открија дека криминалната мрежа се состоела од пет италијански државјани и еден турски државјанин. Групата е обвинета за производство и дистрибуција на висококвалитетни фалсификувани евра до криминални организации во Германија и Шпанија.

Се претпоставува дека преку оваа шема во оптек биле пуштени неколку стотици илјади фалсификувани банкноти.

Целата операција произлезе од апсењето на 47-годишен Италијанец во Германија кон крајот на 2021 година, врз основа на италијански налог за апсење поради членство во „Камора“, перење пари и трговија со дрога. Откако беше екстрадиран во Италија во 2022 година и подоцна пуштен на слобода, тој продолжи да одржува контакти со лица кои управувале со ресторани во Штутгарт, кои служеле за олеснување и прикривање на нелегалните активности, пренесува „Кликс“.