Според извештаите, рускиот претседател Владимир Путин размислува да го врати Сергеј Суровикин – познат и по прекарот „Генерал Армагедон“ – на украинскиот фронт!
Се појавија информации дека Суровикин се вратил во Москва откако поминал неколку години во Африка, објави британскиот весник The Sun.
Рускиот воен коментатор, полковник Виктор Баранец, се осврна на ова, изјавувајќи: „Генерали како него не седат на каучот“.
„На Русија и на нејзината армија им требаат такви генерали. Кремљ и Министерството за одбрана сериозно размислуваат како да го вклучат Суровикин – цврст, одлучен и силен воен командант – во реалноста што моментално се обликува на фронтот“, додаде коментаторот.
Се шират две теории
Според едната теорија, „Генерал Армагедон“ би можел да раководи со операциите насочени кон заземање на украинските утврдени градови Славјанск и Краматорск, каде што руските сили продолжуваат да губат позиции.
Втората теорија сугерира дека тој би можел да предводи нова офанзива кон Киев, која би се протегала сè до окупираниот град Чернихив.
Одлуката за ангажирање на Суровикин доаѓа во момент кога новите податоци укажуваат дека Путин сè повеќе ги таргетира цивилите во Украина како дел од новата стратегија на „војна без правила“. Целта е да се изврши притисок врз Киев и да се принуди преплашеното население да побегне.
Канцеларијата на ОН за човекови права објави дека, во просек, повеќе од 400 цивили неделно биле убиени или ранети во Украина во текот на првите осум месеци од 2026 година. Ова претставува зголемување од 55 отсто во споредба со истиот период во 2025 година.
Служел во Сирија и Чеченија
Суровикин ја предводеше целосната руска воена операција во Украина од октомври 2022 до јануари 2023 година, кога Путин го разреши од таа должност.
Тој ја загуби довербата на Путин поради стравувањата во Кремљ дека тоа лето планирал државен удар предводен од командантот на „Вагнер“, Евгениј Пригожин.
Суровикин – познат по својата бруталност за време на војните во Сирија и Чеченија, како и по залагањето за употреба на нуклеарно оружје на почетокот на војната во Украина – наводно бил казнет со испраќање во Африка, каде што ги надгледувал воените операции на Путин во Северна Африка.
