Фудбалот умира пред нашите очи!

Претседателот на Наполи, Аурелио де Лаурентис, повторно ја разбранува фудбалската заедница со своите предлози за радикални промени во играта, која, според него, е сè потешко да се задржи вниманието на помладата генерација.

Контроверзниот Италијанец смета дека натпреварите треба значително да се скратат и предлага полувремето да трае само 25 минути.

Неговиот став е јасен, тој тврди дека денешниот фудбал е премногу бавен и премногу оптоварен со одложување, што директно влијае на гледаноста, особено кај помладата публика.

Де Лаурентис особено ги критикува играчите за симулирање и често лежење на теренот, нагласувајќи дека таквото однесување го убива ритамот на играта. Според него, современите гледачи немаат трпение за бавно темпо, а лошите натпревари многу брзо ја губат својата публика.

„Кога натпреварот е здодевен, децата едноставно го исклучуваат телевизорот и одат да играат ФИФА на плејстејшн“, рече претседателот на Наполи, живописно објаснувајќи како фудбалот ја губи битката со дигиталната забава.

Друга работа што го мачи е малиот број голови. Тој верува дека ефикасноста е клучот за спектаклот и дека правилата треба да се променат за да се постигнат повеќе голови и да се зголеми привлечноста на играта.

Де Лаурентис особено се осврна на правилото за офсајд, кое често е предмет на контроверзии во ерата на ВАР-технологијата. Газдата на калчолигашот смета дека е неприфатливо да се поништуваат голови поради минимални, речиси невидливи разлики.

„Не можете да поништувате гол поради неколку милиметри. Офсајдот мора да се промени, и тоа драстично“, рече тој.

Неговите идеи сигурно ќе предизвикаат бројни реакции, бидејќи тие допираат до самата суштина на фудбалот каков што го знаеме, но некаде Де Лаурентис е апсолутно во право и сигурно е дека фудбалот има потреба од одредени промени.

Де Лаурентис е претседател на Наполи од 2004 година. Тој го презеде Наполи кога клубот беше на работ на банкрот и го врати од пониските лиги на врвот на италијанскиот фудбал. Под негово водство, Наполи го освои Скудетото пред две сезони, што е прва титула од ерата на Диего Марадона, а истото го повтори и изминатата сезона.

Тој е познат по контроверзните изјави и честопати несоодветното однесување, но и како еден од најголемите владетели во италијанскиот фудбал.