Француските разузнавачки служби сега ја разгледуваат есента 2027 година како можен временски период за големи руски напади – што е порано од претходно предвиденото сценарио за 2030 година – објави во саботата „Франс Телевизион“ (France Télévisions), пренесува „ЈениСафак“.
Според доверлив документ цитиран од медиумот, временската рамка за потенцијален голем руски напад е поместена нанапред, при што есента 2027 година сега се посочува како можен период за такво дејство.
Во извештајот се наведува дека меѓу потенцијалните цели би можеле да се најдат објекти од стратешка инфраструктура, како што се електрани и електроенергетски мрежи, железници, телекомуникациски мрежи и капацитети за водоснабдување.
Ален Кристиен, поранешен заменик-директор на француското воено разузнавање, изјави за „Франс Телевизион“ дека хипотетичкиот напад би можел да вклучува употреба на дрон наполнет со експлозив, насочен кон објект на француската одбранбена индустрија.
Тој истакна дека би можело да биде тешко да се припише таков напад на Русија, додавајќи дека Франција во моментов нема капацитет целосно да се заштити од такво сценарио.
Извештајот доаѓа по доверливиот состанок што во петокот го одржа францускиот претседател Емануел Макрон со претседателските кандидати и лидерите на политичките партии, со цел да се разговара за она што тој го опиша како засилена хибридна закана од Русија кон Франција и Европа.
Макрон изјави дека владата ќе подготви план за заштита на критичната инфраструктура и чувствителните локации во рамките на одбранбената индустриска и технолошка база на земјата од напади со дронови и сајбер-напади. Француската влада побара од префектите да формираат тимови за безбедност и одбрана составени од локалната полиција, разузнавачките служби, војската, образовните власти, деловните субјекти и службите за итни интервенции.
