Франција пред генерален штрајк и масовни протести: Безбедносните мерки на највисоко ниво – мобилизирани специјалните единици, подготвени се дронови и водени топови

Франција се подготвува за нов бран протести и генерален штрајк закажан за четврток, 5 ноември, а националната железничка компанија SNCF најави нарушувања во сообраќајот во регионите и во областа околу Париз, при што ќе биде откажан еден од секои десет брзи возови од типот TGV.

Синдикатите и студентските организации повикаа на продолжување на мобилизацијата, барајќи зголемување на платите и подобрување на животниот стандард, при што се очекуваат протести низ целата земја, пренесува BFMTV.

Според проценките на територијалната разузнавачка служба, во регионалните центри се очекуваат меѓу 500.000 и 700.000 демонстранти.

Францускиот министер за економија, Ролан Лескјур, изјави дека можноста за дополнително зголемување на минималната плата (SMIC) – покрај усогласувањето што е веќе планирано за 1 јануари 2027 година – останува отворена, како и дека одлуката би можела да биде соопштена во наредните денови.

Премиерот најави состанок на работна група
Францускиот премиер Себастиен Лекорну најави дека следната недела ќе се одржи првиот состанок на работната група задолжена за реформирање на системот *Parcoursup*, кој го регулира запишувањето во високообразовните институции. Во процесот ќе учествуваат претставници на студентите и на наставниот кадар, а првичните препораки се очекуваат некаде во ноември.

Безбедносни мерки на највисоко ниво
Во пресрет на протестите, француските власти подготвуваат засилени безбедносни мерки. Министерот за внатрешни работи, Лоран Нуњез, најави распоредување на силни, мобилни полициски сили – вклучувајќи специјализирани единици, беспилотни летала и водени топови – како и засилени контроли низ железничката мрежа.

Полициските служби добија наредба да го зголемат бројот на припадници на терен, што подразбира одложување на обуките и активирање на оперативните резерви.

Во Париз, полициската префектура ја забрани првично предложената траса за протестот – од Бастилја до плоштадот Конкорд – и предложи алтернативна рута, помеѓу плоштадот Република и плоштадот Нација. Слични забрани и измени на трасите се најавени и во други градови, меѓу кои и во Руан.

Според анкетата на институтот „Елаб“ (Elabe) за телевизијата БФМ (BFM), 57 отсто од француските граѓани ја поддржуваат најавената мобилизација, додека 88 отсто сметаат дека барањата поврзани со куповната моќ се оправдани, а 75 отсто ги поддржуваат барањата на учениците и студентите.

Францускиот министер за труд, Жан-Пјер Фаранду, изјави дека се надева оти протестите ќе бидат можност за претставување мерки насочени кон повторно поттикнување на растот на платите во земјата.

Владата најави дека ќе одговори на барањата на демонстрантите преку дијалог и конкретни мерки, додека портпаролката на владата, Мод Брежон, изјави дека властите остануваат „исклучително будни“ за да спречат повторување на насилството и грабежите што беа забележани за време на претходните протести.