Франција воведува данок на шеќер за да се справи со дебелината

Предложената мерка опфаќа оданочување на производи што содржат повеќе од 10 грама шеќер на 100 грама, при што данокот би се движел од четири до 22 евра на 100 килограми, во зависност од видот на производот и содржината на шеќер.

Според „Известувач“ (Raporteur, поранешен Euractiv), данокот би опфатил широк спектар на производи – од печива и колачи до житарици за појадок – со посебен фокус на „преработени, претходно спакувани производи“.

Во пракса, тоа би значело оданочување на производи што главно се продаваат во супермаркети, додека стоките од традиционалните пекарници и другите занаетчиски производители би биле изземени.

Во нацрт-текстот експлицитно се наведува дека целта е да се „зачуваат“ француските занаетчиски производи.

Француската влада има намера да го воведе новиот данок како дел од буџетот за 2027 година, а се очекува тој да генерира приход од приближно 200 милиони евра.

Во образложението на нацрт-текстот се наведува дека болестите поврзани со дебелината – кои погодуваат 17 отсто од француското население и вклучуваат состојби како дијабетес и рак – го чинеле системот за здравствено осигурување повеќе од 50 милијарди евра во 2021 година.

Француското национално здружение на прехранбената индустрија (ANIA) го критикуваше предлогот, а неговиот претседател, Жан-Франсоа Лоазо, предупреди дека „трошокот ќе го платат потрошувачите“.

Организациите за заштита на потрошувачите и здравствените организации имаат различни ставови за тоа кои производи треба да бидат опфатени со данокот.

Одри Морис, координаторка на кампањата на француската групација за заштита на потрошувачите „Foodwatch France“, оцени дека е оправдано данокот да се ограничи на храната што се продава во супермаркети.

Таа истакна дека данокот е насочен кон производи со прекумерна содржина на шеќер кои првенствено се наменети за деца, при што нагласи дека едно од шест деца во Франција страда од дебелина или има прекумерна тежина.

Од друга страна, здравственото здружение „Национална лига против дебелина“ се залага за поширока мерка; еден претставник изјави за *Rapporter* дека треба да се земат предвид и занаетчиските производи со сличен нутритивен профил, пренесува „Танјуг“.