Фицо покажа тајни сателитски снимки: „Зеленски е докажано дека лаже“

Словачкиот премиер Роберт Фицо изјави дека има сателитски снимки што докажуваат дека нафтоводот „Дружба“, кој претходно испорачуваше руска нафта, не е оштетен.

„Со исклучок на еден мал резервоар, главната рута на нафтоводот Дружба не беше оштетена. Значи, претседателот Володимир Зеленски докажано лаже. Мислеше дека на овој начин ќе ги уценува Словачка и Унгарија, иако не знам што сака да постигне од нас“, рече Фицо.

Тој им покажа на новинарите само дел од снимката, според словачките медиуми, тврдејќи дека фотографиите се класифицирани и не можат да се споделат.

Нафтоводот „Дружба“, преку кој со години се транспортираше руска нафта кон Централна Европа, престана да работи во јануари, откако Украина соопшти дека инфраструктурата е оштетена во руски напад на западот на земјата.

Словачките власти и претходно тврдеа дека нивните разузнавачки служби не пронашле докази за сериозни оштетувања на главната траса.

Од канцеларијата на украинскиот претседател порачаа дека обвинувањата се неосновани и го повикаа Фицо ваквите прашања да ги разгледа преку директни разговори, наместо преку јавни настапи.

Во меѓувреме, односите дополнително се влошија откако Словачка најави запирање на итните испораки на електрична енергија за Украина како одговор на прекинот на транзитот на нафта.

Украинските власти тврдат дека земјата ја купува струјата, а не ја добива бесплатно, додавајќи дека Украина може да ја обезбеди од други извори. Словачка и Унгарија се сметаат за меѓу најскептичните членки на ЕУ кога станува збор за намалувањето на зависноста од руска нафта.

Во меѓувреме, унгарскиот министер за надворешни работи Петер Сијарто неодамна престојуваше во Москва на разговори со рускиот претседател Владимир Путин, што дополнително ја нагласува чувствителноста на енергетските и политичките односи во регионот.