Се предвидува дека температурите на површината на морето во централниот и источниот тропски дел на Тихиот Океан ќе достигнат рекордни нивоа до декември, што укажува на натамошно засилување на феноменот Ел Нињо, соопшти Светската метеоролошка организација (СМО).
Ел Нињо е природен климатски феномен што се јавува кога површинските води во тропскиот дел на Тихиот Океан се загреваат повеќе од вообичаено. Според месечниот извештај на СМО, феноменот ќе продолжи да се интензивира сè додека не го достигне очекуваниот врв во декември.
Овој климатски феномен би можел да донесе натпросечни температури во големи делови од светот и да ги измени вообичаените обрасци на врнежи, зголемувајќи го ризикот од суша во некои региони и од поплави во други.
„Ел Нињо е цврсто воспоставен и брзо се интензивира. Прогнозите на СМО укажуваат на веројатност од речиси 100% дека тој ќе опстои до февруари 2027 година и потенцијално би можел да биде еден од најсилните забележани од 1950 година наваму“, изјави генералниот секретар на СМО, Селесте Сауло.
Проценката за веројатност од речиси 100% не се заснова на еден модел, туку претставува консензус меѓу 13 национални и меѓународни метеоролошки центри ширум светот. Нивните прогнози се потпираат на податоци од океански пловци, сателити и метеоролошки сонди, кои се разменуваат во реално време под координација на СМО, агенција на Обединетите нации.
„Ел Нињо не носи нова топлина на планетата. Тој ја ослободува топлината што океанот веќе ја складирал под површината; токму затоа силниот Ел Нињо често придонесува годината да биде една од најжешките досега, како што беше случајот во 2024 година“, рече Сауло на Глобалниот форум за топлина во Бангкок.
Таа додаде дека океанот од кој се ослободува оваа топлина моментално е на највисоко ниво на температура од почетокот на мерењата, што значи дека потенцијалната количина на ослободена топлина е поголема.
За периодот од октомври до декември, се очекува температурите на површината на морето во централниот и источниот екваторијален дел на Тихиот Океан во просек да бидат за 3,7 степени Целзиусови повисоки од нормалата. Се очекува максималната вредност да биде забележана околу декември. Доколку прогнозата се оствари, ова би било највисокото ниво откако се води евиденција и значително над претходниот рекорд од 2,6 степени Целзиусови, забележан во периодот меѓу ноември 2015 и јануари 2016 година.
El Niño will continue to intensify ahead of its forecast peak in December. Sea-surface temperatures in central & eastern tropical Pacific are set to increase to record levels. Above-average temperatures globally & shift in rainfall patterns are likely.
↪️ https://t.co/RkalrbYa4Q https://t.co/JkXBOhtYD7— World Meteorological Organization (@WMO) October 8, 2026
Феноменот „Ел Нињо“ се јавува кога ветровите над Тихиот Океан – најголемиот океан во светот – слабеат. Овие ветрови вообичаено ја потиснуваат топлата вода подалеку од брегот на Јужна Америка кон Азија; сепак, кога тие слабеат, топлата вода се враќа кон американскиот континент, загревајќи го воздухот над океанот.
Ова ги менува главните воздушни струења и може да ги наруши временските обрасци ширум светот, носејќи зголемени врнежи и поплави во некои региони, додека во други предизвикува суша и високи температури, пренесе „Бета“.
