ЕК го казни Тему: Мора да плати 200 милиони евра поради продажба на нелегални производи

Европската комисија изрече казна од 200 милиони евра на „Тему“ за кршење на правилата на ЕУ за продажба на нелегални производи.

„Компанијата не успеа внимателно да ги идентификува, анализира и процени системските ризици од нелегалните производи што се нудат на платформата и штетата што произлегува од тоа за потрошувачите во ЕУ. Доказите што ѝ се достапни на Комисијата покажуваат дека потрошувачите од ЕУ имаат голема веројатност да се сретнат со нелегални производи на платформата Тему“, се вели во соопштението.

Во соопштението се вели дека проценката на ризикот на Тему за 2024 година не ги исполнува стандардите утврдени со Законот за дигитални услуги и „сериозно потценува“ колку често потрошувачите од ЕУ ќе се сретнат со нелегални производи.

Компанијата, исто така, не успеа соодветно да процени како дизајнот на нејзината услуга, вклучувајќи ги системите за препораки и програмите за промоција на производи од страна на поврзаните инфлуенсери, може да ги зголеми ризиците од ширење на нелегални производи.

Истрагата на ЕК откри дека многу висок процент од избраните полначи купени преку платформата не ги поминале основните безбедносни тестови и дека висок процент од тестираните бебешки играчки биле небезбедни поради присуство на неовластени хемикалии или опасност од задушување.

„Изречената казна е пресметана земајќи ја предвид природата на прекршокот, неговата сериозност во однос на засегнатите корисници од ЕУ и неговото времетраење. Неуспехот да се спроведат соодветни проценки на ризикот претставува особено сериозно прекршување на Законот за дигитални услуги“, се вели во соопштението.

Извршната потпретседателка за технолошки суверенитет, безбедност и демократија, Хена Виркунен, изјави дека проценката на ризикот на Тему ги потценува конкретните ризици, нема специфичност, не се базира на цврсти докази и не е сеопфатна.

„Ги остава регулаторите, корисниците и јавноста во незнаење за вистинскиот обем на потенцијалната штета што ја претставуваат нелегалните производи што се продаваат на платформата. Сега е време Тему да дејствува во согласност со законот“, рече Виркунен.

Комисијата има рок до 28 август да достави акционен план до Комисијата, во кој мора да бидат утврдени мерки за справување со прекршувањето на обврските за проценка на ризикот.

Потоа, планот ќе биде разгледан од Европскиот одбор за дигитални услуги и ќе даде свое мислење во рок од еден месец, по што Комисијата ќе има уште еден месец да донесе конечна одлука и да одреди разумен рок за спроведување.