Eдукативни работилници за превенција од врсничко насилство за средношколците во Струмица

Психолозите од средните училишта во Струмица, во соработка со локалната самоуправа и со надлежните институции, ќе организираат едукативни работилници за средношколците од сите години во средните училишта. Работилниците ќе бидат насочени кон препознавање и спречување на врсничкото насилство и на насилството врз жените, соопштија од Општината.

Оваа иницијатива била поведена на работната средба на градоначалникот на Струмица, Петар Јанков, со психолозите од средните училишта и со директорката на Центарот за социјални работи – Струмица, на која се разговарало за потребата од навремена едукација на младите, особено во периодот на адолесценцијата, кога ги воспоставуваат своите први емотивни и партнерски врски.

– Целта е преку интерактивни работилници младите да научат да ги препознаваат облиците на насилство, да ги разберат сопствените права и лични граници, да градат здрави односи и да се запознаат со механизмите на заштита и на институционална поддршка – се наведува во соопштението од Општина Струмица.

Предвидено е да се формира работно тело составено од неколкумина психолози или семејни терапевти, кои, во соработка со Центарот за социјални работи – Струмица и со психосоцијалното советувалиште, ќе ги подготват програмата и содржините на работилниците. Нивната реализација се планира кон крајот на ноември, во рамките на глобалната кампања „16 дена активизам против насилството врз жените“.

– Младите се крвотокот на секое општество. Тие го одржуваат, движат и обновуваат животот во нашата заедница и наша заедничка обврска е да им обезбедиме услови во кои ќе може безбедно да растат, да се развиваат и да ја осмислуваат и обликуваат својата иднина. Затоа мораме да ги научиме како да ги препознаваат нездравите односи, како да ги поставуваат своите граници и како да се заштитат од насилството. Најважно, да знаат дека секогаш имаат кому да му се обратат – наведува градоначалникот Јанков.

Тој додава дека со ова Општина Струмица ја нагласува важноста на превенцијата, едукацијата и на меѓуинституционалната соработка во создавањето безбедна средина за младите, во која секој ќе може да живее без страв од насилство.