Државјани на Србија, Македонија и регионот, евакуирани од Израел, пристигнаа ноќеска во Белград

Граѓани на Србија, Македонија, Босна и Херцеговина, Црна Гора и Хрватска, кои беа евакуирани од Израел, пристигнаа во Белград моќеска, околу два часот по полноќ, со специјален лет на Ер Србија од Шарм ел Шеик, организиран од Владата на Србија и Министерството за надворешни работи.

Со специјален лет, 67 лица кои беа евакуирани од Израел пристигнаа во главниот град на Србија во неколку чекори, а прво беше организиран копнен премин до египетската граница, односно транспорт до аеродромот во египетско одморалиште.

Душан Стефановиќ од Свилајнец изјави за Танјуг за време на летот од Шарм ел Шеик до Белград дека во моментов се чувствува безбедно, откако настаните во Израел го потсетиле на 1999 година и бомбардирањето на СР Југославија.

„Благодарен сум што ни беше овозможено да се евакуираме“, рече Стефановиќ. Зборувајќи за евакуацијата од Израел до Шарм ел Шеик, Стефановиќ рече дека таа била добро организирана и дека се чувствувале безбедно цело време.

„Отидовме со еден автобус од Израел до границата со Египет, а кога ја преминавме, се качивме на друг автобус од границата до Шарм ел Шеик. И еве нè во авионот“, рече Стефановиќ. Според него, работите во Израел се критични откако започнаа последните конфликти, особено во Тел Авив и Ерусалим.

„Самото чувство и глетка додека сте таму не е пријатно, се чувствувате небезбедно и немоќно“, додаде Стефановиќ. Синиша Николиќ од Дервента во разговор со екипата на Танјуг на специјалниот лет рече дека евакуацијата од Израел до египетското одморалиште поминала совршено.

„Сè беше организирано во рок од 24 часа, можеби и помалку, благодарение на Србија што ни овозможи сите да се собереме во Израел и да се појавиме во Шарм ел Шеик за помалку од 24 часа“, рече Николиќ. Како што рече, со оглед на тоа што адреналинот се намалил откако се качиле во авионот, сега се малку уморни и поспани, но пресреќни затоа што сите што изразија желба да се евакуираат се „живи и здрави“. Тој им се заблагодари на Владата на Србија, на претседателот на Србија, Александар Вучиќ, за организирањето на сè во краток временски период.

„Ова беше навистина извонредно. Тие четири дена беа такви, ракети летаа на небото, сите тие ги пресретнаа, но никогаш не сте сигурни дали нешто ќе помине или не, дали ќе падне во близина или не, не е важно“, рече Николиќ. Додаде дека во Тел Авив и Ерусалим се чувствувале поинаку од градот каде што бил со своето семејство.

Специјалниот лет тргна од Белград во вторник околу 17 часот и пристигна во Шарм ел-Шеик околу 21 часот по локално време, односно околу 20 часот по српско време.