Другата страна на инјекциите за слабеење: Пријавени 150.000 можни несакани ефекти и бројни смртни случаи

Повеќе од 150 смртни случаи се пријавени во врска со инјекциите за слабеење, покажуваат податоците на британската Агенција за лекови и здравствени производи (MHRA), која сепак истакнува дека пријавите не докажуваат дека самиот лек го предизвикал фаталниот исход. Објавено е и дека пациентите кои користат лекови за слабеење поднеле околу 150.000 пријави за можни несакани ефекти и други несакани реакции.

Податоците се собрани во рамките на системот „Yellow Card“ на британската MHRA, кој им овозможува на пациентите, членовите на нивните семејства и здравствените работници да пријавуваат несакани ефекти од лековите. Сепак, MHRA нагласи дека пријавите во системот „Yellow Card“ не докажуваат дека лекот предизвикал несакан ефект или смрт. Тие само покажуваат дека лицето што го пријавило случајот се сомневало во можна поврзаност.

Податоците ги опфаќаат лековите од групата GLP-1 кои се достапни во рамките на британскиот Национален здравствен систем (NHS), вклучувајќи ги лираглутид (се продава под името Saxenda), семаглутид (познат како Wegovy) и тирзепатид (се продава како Mounjaro).

Според податоците, за тирзепатид, активната супстанција на лекот Mounjaro, пријавени се 106.189 несакани реакции и 120 смртни случаи за кои постои сомневање дека се поврзани со лекот. Семаглутид, пак, се поврзува со 48.089 пријавени несакани реакции и 59 смртни случаи. Се користи во лекот за слабеење Wegovy, но е и активна супстанција во лековите за дијабетес Ozempic и Rybelsus.

Лираглутид, кој се продава како Saxenda, е поврзан со 4.491 пријавена несакана реакција и 37 смртни случаи. Се користи и за лекување дијабетес под други заштитени имиња.

Податоците од системот „Yellow Card“ ги покажуваат и видовите на пријавени несакани ефекти. Кај семаглутид, 28.884 пријави се однесуваат на дигестивни проблеми, додека повеќе од 5.000 се однесуваат на нарушувања на нервниот систем.

Кај тирзепатид се евидентирани 65.024 пријави за дигестивни проблеми и 13.964 пријави за нарушувања на нервниот систем. Повеќе од 2.000 пријави се однесувале на психијатриски нарушувања.

Кај лираглутид, 1.461 пријава се однесувала на дигестивни проблеми.

Вообичаените несакани ефекти од инјекциите за слабеење вклучуваат гадење, повраќање, дијареја, запек и киселински рефлукс.

Во некои случаи, овие лекови се поврзани и со проблеми со срцето и крвните садови, нарушувања на нервниот систем, проблеми со очите и посериозни дигестивни состојби, од кои некои завршиле со смртен исход.

„Како и кај сите лекови, безбедноста на лековите GLP-1 постојано се следи, вклучувајќи ги и новите сознанија од спонтани пријави и научни публикации. За сите евентуални промени поврзани со безбедноста на тие лекови, пациентите и здравствените работници ќе бидат навремено известени, а ќе се преземат и соодветни мерки за намалување на секој утврден ризик“, изјави портпаролот на MHRA, пренесува „The Independent“.