Драма на небото над Полска: Авион со 181 патник итно пренасочен поради закана со бомба

Авион што летал од Лондон кон Варшава денес извршил вонредно слетување на аеродромот „Варшава-Модлин“, откако било пријавено присуство на експлозивна направа во леталото. Како резултат на тоа, аеродромот е затворен, соопштија претставници на аеродромот.

Авионот слетал во Модлин во 10:01 часот со 181 лице во него, изјави Адам Шабловски, портпарол на аеродромот „Варшава-Модлин“, пренесува ТВН24 (TVN24).

Тој додаде дека се очекува пристигнување на тимови за деактивирање експлозивни направи.

Авионот првично требало да слета на аеродромот „Варшава-Шопен“, но поради пријавената закана бил пренасочен кон Модлин.
Според соопштението од аеродромот, тревога била прогласена во 09:54 часот по добиена закана за поставена бомба на летот од Лондон („Хитроу“) кон Варшава („Шопен“).

Во моментот на слетувањето, во авионот имало 3,7 тони гориво.

„По слетувањето, авионот е упатен кон посебно одредена зона, каде што ќе остане до донесување на натамошни одлуки и упатства од надлежните органи, вклучително и тимовите за деактивирање експлозивни направи“, се наведува во соопштението.

Аеродромот „Варшава-Модлин“ останува затворен до понатамошно известување, додека надлежните органи ја истражуваат пријавената закана и преземаат сите неопходни мерки за да се гарантира безбедноста на патниците, екипажот и вработените.

„Безбедноста на патниците, екипажот и аеродромскиот персонал во моментов е највисок приоритет“, се нагласува во соопштението. Управата на аеродромот најави дека јавноста ќе биде навремено информирана за сите евентуални промени во ситуацијата, како и за повторното воспоставување на воздушниот сообраќај.