Докторот на Ериксен: Кристијан е добро, пејсмејкерот го направи она за што беше вграден

Пријателскиот натпревар во Одензе помеѓу Данска и украинската репрезентација беше прекинат со резултат 2:1 во корист на домаќините. Головите и исходот беа целосно поништени од несреќниот инцидент. Телевизиските снимки покажаа како Ериксен се онесвестува на теренот во 65-тата минута од натпреварот, по што натпреварот беше прекинат, а подоцна и дефинитивно откажан.

Кристијан Ериксен (34) се струполи за време на пријателскиот натпревар помеѓу Данска и Украина. Ериксен се држеше за градите во 66-тата минута од натпреварот и падна на теренот, по што лекарите пристигнаа брзо да му помогнат.

Данскиот фудбалер накратко ја изгуби свеста, но се освести и по околу десет минути стана на нозе и ја прегрна сопругата која излезе на теренот. Играчите од двата тима беа во целосен шок, а судијата означи крај на натпреварот во 76-тата минута.

Данската фудбалска асоцијација веднаш објави на социјалните мрежи дека Ериксен е „свесен и добро“, а националниот лекар Мортен Боесен даде нови информации за состојбата на Ериксен за данската телевизија.

„Кристијан е добро. Во болница е, оди нормално и треба сам да ја напушти болницата откако ќе ги направи прегледите. Тоа се многу добри вести“, рече Боесен и продолжи:

„Го видов како се држи за градите и ни кажува нешто пред да се струполи. Неговиот пејсмејкер веројатно се активираше затоа што почна да има проблеми со срцето. Пејсмејкерот го направи она за што беше вграден, за да го спаси во вакви ситуации. Ќе мора да се подложи на тестови, веќе сме во контакт со неговиот кардиолог. Ќе бидат направени анализи, пејсмејкерот ќе открие што се случило и сигурен сум дека ќе бидат преземени вистинските чекори.

На сите низ глава им поминаа сцените од 2021 година кога срцето на Ериксен застана во Копенхаген за време на натпреварот од Европското првенство против Финска. Тој беше клинички мртов речиси пет минути, но лекарите успеаја да го реанимираат, по што му инсталираа пејсмејкер и Ериксен ја продолжи кариерата.