Доделени наградите за трите најкреативни видеа

Општина Крива Паланка спроведе награден конкурс за кратки видеа со еколошки пораки на тема „Реката не е депонија – твојата одлука прави разлика“.

Tрите најкреативни видеа со најсилна порака, согласно со критериумите, добија парични награди.

Првонаградено е видеото „Реката не заслужува ѓубре, таа е за сите нас“, второто место го освои „Ајде да дејствуваме, реката да не ја загадуваме“ и третата награда е доделена за видеото „Чиста река, здрава иднина“.

Конкурсот е во рамките на проектот „Интегрирање на родовата перспектива во обезбедување на локални услуги во Југоисточна Европа преку НАЛАС“, поддржан од НАЛАС и од ЗЕЛС, а финансиран од UN WOMEN.

– Во рамките на проектот, Општина Крива Паланка распиша конкурс со кој ги повика учениците од основните училишта и од средното училиште на територијата на Општина Крива Паланка да ја кажат својата порака за заштита на реките и на животната средина преку видеосодржина. Младите од градот беа креативни на тема „Реката не е депонија – твојата одлука прави разлика“, пристигнаа инспиративни видеа, кои комисијата ги разгледа и оцени, а градоначалникот го донесе решението за добитниците, кои ќе бидат соодветно наградени за својата креативност – информираат од Општината.

Конечната ранг-листа е објавена на официјалната страница на Општината.

– Преку овој конкурс, Општина Крива Паланка промовира вклучување на родовата перспектива во управувањето со отпадот, бидејќи чистата животна средина е заедничка вредност и заедничка одговорност – потенцираат од локалната самоуправа.