Дивечот во НП „Пелистер“, по интензивираните активности на ренџерската служба, сè почесто може да се забележи во неговите живеалишта во зоната на активно управување и во зоната на строга заштита.
На фотографиите од фотозамките лесно може да се забележи каде се движи дивечот, колкава е неговата бројност, во каква здравствена состојба се наоѓа и како функционира во секојдневието како дел од синџирот на исхрана.
На фотографиите може да се забележи волк (Canis lupus) во улога на предатор како се движи со својот плен (срндач – Carpeolus carpeolus), потоа по подолго време на интензивен мониторинг е забележана дивокоза (Rupicapra rupicapra), но и движењето на диви свињи (Sus scrofa) во група. Ова е карактеристично за овој животински вид на Пелистер.
Исто така, можат да се забележи и дива мачка која, како што велат од НП „Пелистер“, честопати се случува да биде помешана од посетителите со рисот.
– Дивата мачка има свои карактеристики и во значителна мера се разликува од Балканскиот рис – тврдат од НП „Пелистер“.
