„Црн четврток“ за Австријците во Хрватска: Медиумите известуваат за две трагедии со повеќе жртви

Австриските медиуми известуваат за вчерашниот ден во Хрватска како „црн четврток“ за нивната земја. Шокот и тагата во Австрија сè уште не се смирени по ужасната несреќа во Хрватска, каде што четворица Австријци загинаа во пад на мал авион во близина на Медулин вчераутро, а истиот ден се случи уште една трагедија во која учествувале двајца австриски државјани кои биле на одмор во Хрватска.

Како што објави доцна синоќа австрискиот весник „Кронен Цајтунг“, јахта што превезувала двајца австриски туристи удрила во ограден дел од пристаништето во близина на Пула во раните утрински часови во четврток, со брзина од 50 километри на час. Едно лице загинало, а другото е тешко повредено.

Весникот наведува дека пристанишната управа во Пула објавила дека кратко по несреќата, телото на неидентификувано лице е пронајдено како плови во морето. Се наведува дека австриски државјанин наводно претрпел смртоносни повреди во несреќата. Другото, тешко повредено лице е во животна опасност.

„Таа претрпела сериозни повреди на главата, градите и стомакот“, изјавил дежурниот лекар во болницата во Пула, истакнува весникот.

Според австрискиот весник јахтата била долга 7,7 метри и имала мотор од 200 КС. Причината за ужасната несреќа сè уште се истражува.

„Поради градежните работи, делот од пристаништето бил осветлен со навигациски светла“, објаснил Давор Ромиќ од Пулската пристанишна управа за хрватските медиуми, пренесува „Кроне“.

Тој, исто така, забележал дека јахтата била правилно регистрирана. Сепак, нејзината брзина наводно била преголема.