Трагичната смрт на 32-годишниот Кристијан Јосип Периш предизвика голема полемика во клиниката „Јанкомир“ во Загреб, откако беше обелоденето дека таму, во текот на три години, починал 201 пациент. Случајот со Периш ја стави психијатриската клиника „Јанкомир“ под лупата на јавноста – и тоа не за првпат.
Пред речиси две години, едно 19-годишно момче упадна во основно училиште во населбата Пречко, при што со нож усмрти седумгодишно дете, а повреди неколку други ученици и еден наставник. Бидејќи младиот човек се лекувал во дневната болница при „Јанкомир“, здравствените инспектори тогаш спроведоа темелна проверка на неговиот третман.
Сепак, не беа утврдени никакви неправилности или лекарски грешки – заклучок што беше потврден и со стручна ревизија спроведена од Лекарската комора.
Но, во случајот со Периш, првичните резултати од инспекцијата, објавени во четвртокот, открија сериозни пропусти. Ова покрена низа прашања, доведе до дополнителна истрага, а резултираше и со оставка на директорката на клиниката, Мајда Грах.
Претходно, Грах отпушти четворица медицински техничари кои, додека Периш бил врзан (физички ограничен), го задушиле со перница, го удирале и притискале со колена врз неговиот врат и граден кош. Шокирани од веста за итното отпуштање на техничарите, нивните колеги и останатиот медицински персонал се собраа пред болницата следното утро за да им дадат поддршка. Сепак, кога се појави вознемирувачко осумминутно видео на кое се гледа брутално насилство врз врзаниот пациент Периш, многумина зажалија што учествувале на тој протест.
Во изминатите неколку дена се појавија сведоштва од поранешни пациенти на „Јанкомир“, во кои се опишува наводен брутален третман од страна на вработените.
Еден сведок контактираше со медиумите, тврдејќи дека на видеото го препознал еден од техничарите – истото лице кое, наводно, во јануари оваа година, во „Јанкомир“ удрило и гушело со перница еден врзан пациент, заканувајќи му се дека ќе го убие доколку проговори за инцидентот. Сведокот, преку адвокат, ја известил болницата и поднел кривична пријава; сепак, предвиденото препознавање на техничарот никогаш не се случило.
Хрватските медиуми објавија дека Општинското државно обвинителство спроведува претходни истражни дејствија во врска со оваа пријава. Исто така, се појавија детали за полициска постапка против еден од четворицата техничари кои моментално се наоѓаат во притвор во затворот „Реметинец“. Овој 28-годишник минатото лето бил пријавен за нарушување на јавниот ред и мир по вербална расправија со полицијата, при што бил под дејство на алкохол – измерената концентрација на алкохол во крвта изнесувала 2,24 промили.
Директорката Грах раководеше со „Јанкомир“ нешто помалку од една година пред да поднесе оставка. Таа ја презеде функцијата вршител на должноста директор преку ноќ, по разрешувањето на нејзиниот претходник, Владимир Грошиќ, кон крајот на октомври минатата година. Грошиќ беше отстранет од функцијата откако се дозна дека УСКОК (Канцеларијата за сузбивање на корупција и организиран криминал) го товари за примање поткуп во замена за местење договори за градежни фирми за време на реновирањето на еден дел од болницата. Во ноември Грошиќ беше уапсен, а на почетокот на годината, во јануари, се врати во болницата како лекар на одделот за деменција, пишува „Вечерњи“.
Прашањето за смртноста во психијатриските установи вчера беше покренато и во Градското собрание на Загреб, при што се покажа дека, иако Психијатриската клиника „Врапче“ има речиси двојно повеќе хоспитализации, таму сепак има значително помал број смртни случаи отколку во „Јанкомир“.
Податоците од Статистичкиот годишник покажуваат дека во 2024 година во „Врапче“ имало 6.543 пациенти, од кои 32 починале, додека во „Јанкомир“ починал 51 пациент од вкупно 5.019. Во 2023 година, во „Врапче“ имало 12.673 хоспитализирани пациенти, од кои 51 починале, додека во „Јанкомир“ имало 5.350 пациенти и 72 смртни случаи. Слично беше и во 2022 година, кога во Јанкомир починаа 78 од 5.356 пациенти, а во Врапче починаа 49 од 12.309 пациенти.
