Бундестагот ги проширува овластувањата на безбедносните служби

Во петокот, Бундестагот изгласа проширување на овластувањата на безбедносните служби за борба против шпионажа, тероризам и саботажа. Опсежната реформа на правната рамка што ги уредува овие служби беше поддржана од 309 пратеници, додека 190 гласаа „против“, а 71 беа воздржани, пренесе дпа.

Како што пренесува dpa, прописите го дефинираат опсегот на дозволени и забранети дејствија за Сојузната разузнавачка служба (BND) – надлежна за разузнавање во странство – и за Сојузната канцеларија за заштита на уставот (BfV) – надлежна за внатрешната безбедност.

Новите овластувања вклучуваат можност за користење алатки за надзор на телекомуникациите, како и за споредување на биометриски податоци.

Во иднина, Сојузната канцеларија за заштита на уставот не само што ќе смее да собира податоци и да следи поединци, туку под одредени околности ќе има овластување и тајно да влегува во приватни домови во потрага по оружје и експлозиви.

Апсењата и јавните претреси остануваат во исклучителна надлежност на полицијата.

На Сојузната разузнавачка служба ѝ се доделува овластување да спроведува оперативни интервенции во странство – на пример, преку онеспособување на сервери што ги користат хакерски групи кои дејствуваат под покровителство на странска држава.

За одредени нови мерки, службите ќе мора претходно да добијат одобрение од посебна комисија составена од поранешни судии.

Владата ја иницираше оваа реформа како одговор на растечката закана од странски разузнавачки служби – првенствено оние на Русија, Кина и Иран. Друг мотивирачки фактор беше желбата да се намали зависноста од разузнавачките податоци што ги обезбедуваат сојузничките земји.