Британската полиција упадна во базата на верска секта: Зад четири ѕида се одвивале тешки сексуални злосторства, принудни бракови, модерно ропство

Шест лица се уапсени под сериозни обвиненија, вклучително и модерно ропство, во религиозна група во Чешир, Велика Британија, соопшти полицијата.

Повеќе од 500 полицајци учествуваа во рации на три локации како дел од истрагата за групата со седиште во Кру наречена Ахмади Религија на мирот и светлината (ARPOL), која е основана од следбеници на шиитскиот ислам на почетокот на овој век, според Би-Би-Си.

Полицијата во Чешир соопшти дека минатиот месец била запознаена со обвинувањата за сериозни сексуални престапи, принудни бракови и модерно ропство, за кои се вели дека се случиле во 2023 година.

Групата моментално има околу 150 членови, а обвиненијата се однесуваат на една жена која била членка во времето на наводните злосторства.

Четири мажи и две жени, од различни националности, вклучувајќи американска, мексиканска, италијанска, шпанска и британска, беа меѓу уапсените.

Рациите беа извршени околу 8:50 часот по локално време во вторник, при што голем број полициски и итни возила беа видени во близина на спортскиот терен „Крал Џорџ V“.

Затворање на улици беше пријавено и во областа на авенијата Викторија, во близина на паркот Квинс.

Детективите претресоа три имоти, вклучувајќи ја и куќата Веб, а полицијата соопшти дека соработува со локалните власти за да им обезбеди поддршка на жителите и да воведе соодветни заштитни мерки.

Портпаролот на локалниот совет ја потврди нивната вмешаност: „Наш приоритет е да се осигураме дека луѓето кои се раселени се безбедни и згрижени.“

„Денешната операција е резултат на детална и темелна истрага“, рече главниот началник Гарет Вригли.

„Иако членовите на оваа група се уапсени, сакам јасно да ставам до знаење дека ова не е истрага за религија, туку за сериозни обвинувања што ни се доставени до вниманието.“

ARPOL е основана на почетокот на овој век и се потпира на шиитската традиција, но главните муслимански заедници одамна се дистанцираа од групата.

Организацијата не треба да се меша со муслиманската заедница Ахмадија, која е гранка на сунитскиот ислам, е основана во Пакистан и има значително присуство во Велика Британија.

Пратеникот на Лабуристите за Кру и Нантвич, Конор Нејсмит, рече дека разбира дека рациите ги вознемирија локалните жители.

„Побарав темелна и брза истрага од страна на полицијата за да се обезбеди спроведување на правдата и да се смири заедницата“, додаде тој.

Полицијата нагласи дека сериозно ги сфаќа сите пријави за сексуален напад и ќе стори сè што може за да се обезбеди спроведување на правдата.

Тие додадоа дека нема ризик за пошироката заедница и дека е зголемено полициското присуство за да се обезбеди дополнително чувство на безбедност.

„Би ги повикал сите што имаат какви било информации да контактираат со полицијата“, рече Вригли.

Тој додаде дека ќе продолжи да има „значително полициско присуство“ во областа, како за истрагата, така и за да се увери јавноста.