Двајца Евреи избодени со нож во Лондон; Шеф на полицијата: „Нападот се третира како терористички чин“

Двајца евреи се сериозно повредени откако беа избодени во Голдерс Грин, северен Лондон.

За инцидентот соопшти еврејската безбедносна група Шомрим, пренесе Би-Би-Си.

Локален жител изјавил дека едниот маж бил избоден пред продавница, а другиот пред синагога.

Се вели дека полицијата пристигнала и со електрошок го совладала напаѓачот, кој потоа бил уапсен.

Шефот на полицијата за борба против тероризмот и помошник-комесар, Лоренс Тејлор, потврди дека денешниот напад во еврејската населба Голдерс Грин во Лондон, во кој две лица беа избодени со нож, се третира како терористички инцидент.

Тејлор рече дека „високо специјализиран“ тим од истражители за борба против тероризмот соработува со Метрополитенската полиција за „да ја продолжи истрагата“ и додаде дека полицијата соработува со „безбедносни партнери“, објави Скај њуз. „Една од насоките на истрагата е дали овој напад бил намерно насочен кон еврејската заедница во Лондон. Сакам да бидам јасен дека полицијата за борба против тероризмот и полициските сили низ целата земја мобилизираат дополнителна поддршка. Би ја замолиле јавноста да биде будна и да биде тука за заедниците кои веројатно ќе бидат загрижени вечерва“, рече Тејлор.

Комесарот на Метрополитенската полиција Марк Роули рече дека уапсениот човек имал „историја на сериозно насилство и проблеми со менталното здравје“.