„Бог ги одбива молитвите на оние чии раце се крвави“ Папата Лав со вознемирувачко предупредување за иднината на човештвото

Папата Лав во вторник предупреди дека иднината на човештвото е во опасност да биде „трагично загрозена“ од тековните војни и распаѓањето на меѓународното право, во остар говор во Екваторска Гвинеја за време на турнејата низ четири земји во Африка.

Првиот американски папа, кој го предизвика гневот на американскиот претседател Доналд Трамп откако стана поотворен во своите критики во последните недели, исто така ја осуди „колонизацијата“ на нафтените и минералните ресурси на Земјата, за која рече дека поттикнува крвави конфликти.

„Судбината на човештвото е во опасност да биде трагично загрозена без промена на насоката и политичката одговорност и без почитување на институциите и меѓународните договори“, рече папата.

Во говорот до претседателот на Екваторска Гвинеја, Теодоро Обијанг Нгуема Мбасого, и други политички лидери, поглаварот на Католичката црква, која има 1,4 милијарди членови, рече: „Бог не го сака ова“.

„Неговото свето име не смее да се осквернува од желбата за доминација, ароганција или дискриминација. Пред сè, никогаш не смее да се повикува за да се оправдаат изборите и дејствијата што носат смрт“, рече тој.

Папата Лав, кој ја посети Екваторијална Гвинеја како дел од последната етапа од амбициозната 10-дневна африканска турнеја, усвои нов, посилен стил на говор за време на престојот во Африка, остро осудувајќи ја војната, нееднаквоста и глобалното лидерство.

„Луѓето се експлоатирани од авторитарни владетели и измамени од богатите“
Во понеделник, тој предупреди на настан во Ангола дека многу луѓе во светот се „експлоатирани од авторитарни владетели и измамени од богатите“.

Коментарите на папата Лав во кои се жали на употребата на религијата за оправдување на насилството се одраз на неговите изјави од март, кога рече дека Бог ги отфрла молитвите на лидерите чии „раце се полни со крв“.

Конзервативните католички коментатори ги протолкуваа коментарите како насочени против американскиот министер за одбрана Пит Хегсет, кој користи христијанска реторика за да ја оправда војната против Иран.

Лав во последните недели се појави како сè погласен критичар на војната, објави Ројтерс.