Бидете дел од олимписката приказна: Отворени апликации за волонтери за Игрите во Лос Анџелес 2028

Подготовките за Олимписките и Параолимписките игри во Лос Анџелес 2028 веќе започнуваат, а организаторите го отвораат патот за сите кои сакаат да бидат дел од ова глобално спортско случување.

Македонскиот олимписки комитет (МОК) ги информира сите заинтересирани дека се отворени апликациите за волонтери за ЛА28.

Волонтерите ќе бидат важен дел од тимот кој работи зад сцената на Игрите, придонесувајќи за нивната успешна организација и создавањето на позитивно искуство за спортистите, навивачите и посетителите. Ова е можност за сите љубители на спортот, младите и оние кои сакаат да стекнат нови искуства да бидат дел од еден од најголемите спортски настани во светот.

Покрај можноста да бидат дел од организацијата на Олимписките и Параолимписките игри, волонтерите ќе имаат шанса да развијат нови вештини, да стекнат искуство во меѓународна средина, да работат со луѓе од различни култури и да создадат контакти кои можат да бидат вредни и во иднина. Учеството како волонтер на ЛА28 претставува можност за лично и професионално надградување, како и уникатно искуство поврзано со олимпиското движење.

Под мотото „Follow the Sun“  („Следи го сонцето“), ЛА28 ја носи визијата за Игри исполнети со енергија, различност и поврзување преку спортот. Во оваа визија свое место имаат и волонтерите – луѓето кои со својата посветеност ќе помогнат во создавањето на атмосферата по која Олимписките и Параолимписките игри се препознаваат.

Можноста е отворена за сите кои сакаат да бидат дел од едно меѓународно искуство, да запознаат луѓе од целиот свет и да придонесат за организацијата на Игрите во Лос Анџелес 2028.