Американските воени потези укажуваат на конфликт што ќе потрае!

Централната команда на САД побара од Пентагон дополнителни човечки ресурси за работа во нејзиното седиште во Тампа, Флорида, за поддршка на операциите против Иран најмалку 100 дена, а можеби и до септември, дознава Политико.

Иако барањето не е доказ за тоа колку долго би можела да трае војната, тоа е прв показател дека американските воени и разузнавачки претставници сметаат на можноста за конфликт што ќе трае со месеци. Тоа е значително подолго од проценките што неодамна ги даде американскиот претседател Доналд Трамп, кој рече дека војната би можела да трае до четири недели.

Според Политико, овие потези сугерираат дека американската администрација можеби не била целосно подготвена за пошироката војна што сега се развива.

Пентагон се обидува да распореди дополнителни системи за воздушна одбрана, особено поевтини системи за борба против беспилотни летала. Иран има голем број беспилотни летала Шахид, кои често летаат под радарскиот дострел, додека американската војска користи многу поскапи ракети за да ги собори.

Во исто време, се разгледува можноста курдските воени формации, со поддршка на САД и Израел, да бидат вклучени во операции против Иран, со што би се избегнало испраќање на американски копнени сили, што политички е тешко да се оправда поради противењето на американската јавност на нова војна.

Трамп и другите западни претставници стравуваат дека конфликтот што трае повеќе од еден месец би можел да има сериозни глобални економски последици. Особено загрижува можноста за блокирање на Ормутскиот теснец, една од најважните трговски артерии во светот, што би можело да доведе до нагло зголемување на цените на енергијата.

Американската администрација е исто така загрижена дека зголемувањето на инфлацијата и цените на горивата би можеле дополнително да ги ослабат шансите на републиканците да ја задржат контролата врз Претставничкиот дом на изборите што ќе се одржат во ноември.

Брз крај на конфликтот би им одговарал и на Европа и на Кина, чии економии зависат од стабилни логистички рути во близина на Иран, кои се клучни за глобалната трговија.