Aмериканците вечерва одат на Месечината – Трамп пушти песна од Мадона и порача: „Вселената е следната голема граница на Америка“/ВИДЕО

Американскиот претседател Доналд Трамп објави видео во кое ги слави Соединетите Американски Држави како „нација на пионери“ пред планираното лансирање на вселенското летало Орион кон Месечината. Музиката во позадина на видеото е песната на Мадона „Like a Prayer“.

Трамп ќе го гледа лансирањето од Белата куќа, потврди NBC News.

Во видео објавено од Белата куќа на платформата X, Трамп рече: „Судбината на Америка е да биде на чело на вечната човечка потрага по знаење и да ги води нациите на патување во непознатото. Човечката душа копнее по откритија, а откривајќи ги тајните на универзумот, ние исто така откриваме вистини за себе“.

„Вселената е следната голема граница на Америка“
„Ние сме нација на пионери, а следната голема граница на Америка е вселената. Никогаш не ја завршивме, но сега почнуваме одново“, додаде тој.

Трамп потоа напиша на Truth Social дека Артемис 2 е „меѓу најмоќните ракети некогаш изградени“. Тој исто така ја искористи можноста да каже дека Америка „ПОБЕДУВА, во вселената, на Земјата и насекаде помеѓу нив, економски, воено, а сега и НАД ЅВЕЗДИТЕ“.

„Никој не е ни блиску до нас! Америка не се натпреварува, ние ДОМИНИРАМЕ, а целиот свет гледа. Бог да ги благослови нашите неверојатни астронаути, Бог да ја благослови НАСА и Бог да ја благослови најголемата нација што некогаш постоела, Соединетите Американски Држави“, заклучи тој.

Мисијата треба да трае околу 10 дена
Мисијата „Артемис 2“ на НАСА треба да биде првиот лет со екипаж до Месечината за повеќе од половина век, отворајќи ново поглавје во истражувањето на вселената. Се очекува мисијата да трае приближно 10 дена и ќе биде првиот лет со екипаж на „Артемис“. Оваа фаза следи по мисијата „Артемис 1“ во 2022 година, кога беспилотното вселенско летало орбитираше околу Месечината.

НАСА сега има намера да потврди дека вселенското летало и ракетата се во исправна состојба пред да се обиде да слета на Месечината, пресвртница што моментално е планирана за мисијата „Артемис 4“ во 2028 година.

За разлика од програмата „Аполо“, во рамките на која човекот првпат стапна на Месечината во 1969 година, овој пат НАСА соработува со приватната индустрија и други земји, особено европските.

Ова се однесува на „Спејс Екс“ и „Блу Ориџин“, конкурентски компании основани од милијардерите Илон Маск и Џеф Безос, кои се задолжени за развој на лунарните модули.

За прв пат по повеќе од половина век: Луѓето заминуваат на пат околу Месечината – НАСА вечерва ја лансира „Артемис 2“