Криста Пајк, осуденичка на смрт од Тенеси која минатата недела преживеа неуспешна егзекуција, сега е станата и се движи, а нејзиното неочекувано закрепнување продолжува, според нејзиниот адвокат.
Пајк (50) беше осудена на смрт за „сатанистичкото“ убиство на нејзината соученичка Колин Слемер во Ноксвил во јануари 1995 година. Сепак, откако на 30 септември преживеа двојна доза од смртоносниот лек пентобарбитал во затворот со максимално обезбедување „Ривербенд“ во Нешвил, таа итно беше пренесена во болница, пренесува „Индепендент“.
Нејзиниот правен тим во вторникот објави дека таа се разбудила и почнала да зборува; во средата беше откриено дека таа нема сеќавање на она низ што поминала и дека е „лута и збунета“ поради сè што ѝ се случило.
Говорејќи во емисијата „Тудеј“ на „Би-би-си Радио 4“ во четвртокот наутро, адвокатот Стивен Ферел изјави дека неговата клиентка се чувствува „прилично добро“, но дека претстои долг процес на закрепнување и дека многу работи остануваат неизвесни.
„Според она што ми е пренесено, ситуацијата е сложена. Рацете ѝ се сериозно повредени и таа едвај може да ги користи“, рече тој.
„Денес таа стана и прооде за првпат – само низ собата, не многу далеку. Се врати назад и жива е – среќни сме поради тоа – но сè уште не е целосно ментално закрепната.“
„Таа е прилично присебна, но истовремено и донекаде зашеметена. Многу лесно го губи текот на мислите и заборава што сакала да каже.“
Правните застапници на Пајк извојуваа победа во средата кога судијката А’Аиша Мајлс му нареди на Одделот за поправни установи на Тенеси да го зачува „сè она што се наоѓало во просторијата“ од моментот кога државата се обидела да ја изврши егзекуцијата, со цел тие предмети да послужат како докази во идната истрага за тоа како дошло до таков сериозен пропуст.
Со наредбата на судијата Мајлс, од државата се бара да ги зачува сите снимки, изјави од сведоци и електронска кореспонденција, како и лековите, шприцевите, интравенските линии и сите други медицински материјали од просторијата за извршување на смртната казна.
Во изјавата за новинарите по настанот, колегата на Ферел, Ренди Спајви, сподели дополнителни детали за закрепнувањето на Пајк.
Тој раскажа дека, кога таа првпат дошла при свест во болницата, ги прашала медицинските лица собрани околу нејзиниот кревет: „Каде сум и кои сте вие?“
Тој објасни дека уште во понеделникот, тој и другите адвокати верувале оти нивната клиентка е мозочно мртва и очекувале таа да биде исклучена од апаратите за одржување во живот следниот ден.
