Њујорк Тајмс: Трамп му овозможи на Болсонаро влез во САД

Американскиот претседател Доналд Трамп му даде дозвола на Флавио Болсонаро, кој ги загуби претседателските избори во Бразил во неделата, да влезе во Соединетите Држави додека се соочува со повеќе кривични истраги, потврдија американски официјални лица.

Болсонаро моментално е во Флорида со привремен статус доделен од претседателот Трамп и веројатно подоцна ќе му биде доделен постојан престој, објави денес „Њујорк тајмс“, повикувајќи се на неименувани официјални лица.

Болсонаро избега од Бразил откако ги загуби изборите во неделата од Луиз Инасио Лула да Силва, но американската гранична полиција му дозволи нему и на неговото семејство да влезат во Соединетите Држави со „условна дозвола за влез“, која обично се дава од хуманитарни причини.

Бразилските власти во понеделник побараа од Болсонаро да ги предаде своите пасоши во рок од 24 часа како дел од истрагата за неговите врски со бразилски адвокат обвинет за перење повеќе од 1 милијарда долари преку шема за онлајн коцкање.

Кога не ги предаде до вторник наутро, властите ги поништија документите и издадоа известување за имиграција со кое му се забранува на Болсонаро да ја напушти земјата, а не е јасно како успеал да влезе во Аргентина.

Болсонаро премина од Бразил во Аргентина по копно во вторник вечерта, придружуван од неговата сопруга и двете ќерки, соопшти Националната агенција за миграција на Аргентина во среда.

Потоа се качија на приватен лет за Гвајакил, Еквадор, од каде што отпатуваа за Соединетите Американски Држави.

Авионот, организиран од службеникот за комуникации на Белата куќа, Џејсон Милер, слета во Мајами, Флорида.

По слетувањето, Болсонаро се прогласи за легитимен лидер на Бразил, а Трамп потврди дека на поразениот бразилски кандидат му е дозволено да влезе во земјата.

Министерството за внатрешна безбедност на САД соопшти дека Болсонаро и неговото семејство биле „примени и проверени од страна на царинските и граничните агенти, во согласност со важечките закони и процедури за имиграција“.

Според анализата на „Њујорк тајмс“, Болсонаро претставил поништен бразилски дипломатски пасош по пристигнувањето во Соединетите Држави.

Стејт департментот на САД во вторникот соопшти дека планира да им издаде визи на Болсонаро и неговото семејство за влез во земјата, изјава потврдена од Белата куќа.

Се очекува Болсонаро во одреден момент да аплицира за статус на постојан жител, познат како „зелена карта“, изјави американски функционер, а се очекува неговото барање за документот да биде брзо обработено.

Болсонаро тврди дека го напуштил Бразил затоа што се соочувал со политички прогон.

Трамп вчера изјави дека му дозволил на Болсонаро да влезе во Соединетите Држави, но дека „нема да се меша“ во неговиот случај и ги опиша претседателските избори во Бразил како „многу чудни“.

Претседателот на САД денес одби да каже кој е легитимен победник на изборите во Бразил и додаде дека не зазел страна за време на гласањето затоа што Лула го замолил да не го прави тоа.

„Мислам дека тие избори беа голем срам за народот на Бразил“, рече тој.

Бразилската полиција соопшти дека во моментов „ги истражува околностите под кои сенаторот не ги почитувал судските наредби“.