Зоолошките градини во Скопје и во Битола ќе се трансформираат во современи европски центри

По повод одбележувањето на Меѓународниот ден на биодиверзитетот, во Зоолошката градина во Скопје денеска беше потпишан меморандум за соработка меѓу Министерството за животна средина и просторно планирање и зоолошките градини од Скопје и од Битола, со цел нивна модернизација и усогласување со европските стандарди.

Министерот за животна средина и просторно планирање, Муамет Хоџа, изјави дека потпишувањето на меморандумот претставува доказ за градење силни партнерства и посочи дека Владата има јасна цел: трансформација на зоолошките градини во современи европски центри.

Според него, овие институции треба да станат центри што ќе се фокусираат на благосостојбата на животните, заштитата на дивиот свет и едукацијата на младите. Хоџа нагласи дека преку механизмот БИОФОН ќе се обезбедат стабилни финансиски средства за поддршка на заштитените подрачја, екосистемите и проектите на зоолошките градини.

– Овие чекори се инвестиција во иднината, а свеста за природата се гради уште од најрана возраст. Младите се идни чувари на природното богатство – истакна Хоџа.

Тој додаде дека земјава располага со богато и ендемично природно наследство, кое претставува и гордост и обврска, а неговата заштита е можна само преку заедничка работа на институциите, научната јавност и граѓаните.

В.д. директорката на Зоолошка градина Скопје, Катерина Костова, порача дека годинашното мото „Делување локално, за глобално влијание“ потсетува дека големите промени почнуваат од локалната заедница и од секој поединец.

Таа истакна дека зоолошките градини денес не се само места за изложување животни туку и центри за едукација, научна работа и заштита на биодиверзитетот.

– Нашата визија е Зоолошката градина да продолжи да се развива како современ едукативен центар, со подобрени живеалишта и услови за животните и да биде гордост на градот – рече Костова.

Во рамките на настанот беше организирана изложба на едукативни цртежи изработени од учениците од основните училишта, како и едукативна прошетка низ Зоолошката градина, каде што децата имаа можност поблиску да се запознаваат со ендемичните видови од Македонија и да слушнат интересни факти за нивната заштита и животните навики.

Децата имаа можност да ја следат забавната активност на детскиот аниматор Кико Магико.