Летото е зад нас, а денес, на 23 септември, официјално започнува есента – годишно време што носи пократки денови, подолги ноќи и постепено опаѓање на температурите.
Почетокот на есента е означен со есенската рамноденица, моментот кога денот и ноќта имаат приближно еднакво времетраење. Астрономската есен ќе трае 89 дена, 20 часа и 45 минути, сè до 21 декември во 21:50 часот, кога започнува зимата.
Од денеска, па натаму, деновите ќе стануваат пократки, а ноќите подолги, сè до зимската краткодневица.
Секој септември повторно ги поставуваме истите прашања: кога точно започнува есента, што е рамноденица и зошто пролетта, летото и зимата започнуваат на 21-ви во месецот, додека есента започнува на 23-ти?
Додека астрономите го пресметуваат точниот почеток на есента до минута врз основа на положбата на Сонцето, метеоролозите користат поедноставен систем за да го олеснат следењето на статистиките и климатските податоци, пренесува Punkufer.hr.
Така, метеоролошката есен започнува на 1 септември и трае до 30 ноември. Таа е дефинирана преку фиксни, целосни календарски месеци – септември, октомври и ноември – за да им се овозможи на метеоролозите полесно да ги следат, споредуваат и одржуваат климатските статистики.
Астрономската есен започнува на 22 или 23 септември, а завршува на 21 или 22 декември. Таа се одредува според прецизниот астрономски момент на есенската рамноденица, кога Сонцето го преминува небесниот екватор на небесната сфера.
Оваа година, официјалниот астрономски почеток на есента на северната хемисфера е во среда, 23 септември, во 02:05 часот по средноевропско летно време (CEST).
Во тој момент, Сонцето го преминува небесниот екватор од север кон југ. На денот на рамноденицата, Сонцето изгрева точно на исток и заоѓа точно на запад, додека денот и ноќта траат речиси еднакво долго низ целата планета – приближно по 12 часа.
Во текот на наредните недели, есента постепено ќе го менува пејзажот. Зеленилото ќе отстапи место за нијанси на жолта, портокалова и црвена боја, додека утрата и вечерите ќе стануваат сè посвежи.
Иако почетокот на есента не значи дека температурите нагло ќе паднат, пред нас е период на постепено заладување, придружено со зголемена разлика меѓу дневните и ноќните температури.
Астрономската есен ќе трае сè до почетокот на зимата – поточно, до зимската краткодневица во декември.
Со тоа, летото заврши и според календарот – добре дојде, есен!
