Климатските научници проценуваат дека рекордно силниот феномен „Ел Нињо“, кој моментално ја загрева планетата, би можел да биде поврзан со повеќе од 450.000 дополнителни смртни случаи предизвикани од горештини во текот на следните шест месеци.
Според новиот извештај на „Climate Impact Lab“, некои од најсиромашните и најжешките земји во светот – од Нигерија и Индонезија до Индија и Судан – би можеле најтешко да го почувствуваат ова влијание.
Проценката го опфаќа периодот од септември 2026 до февруари 2027 година, за кој моментално постојат температурни прогнози. Сепак, научниците предвидуваат дека порастот на смртноста поврзана со горештините би можел да продолжи сè до јуни или јули следната година, пренесува „Гардијан“.
„Ел Нињо“ веќе урива рекорди
Овој „Ел Нињо“ веќе достигна нивоа без преседан. Во понеделникот, температурите во клучниот регион на тропскиот дел на Тихиот Океан го надминаа претходниот рекорд – неколку месеци пред очекуваниот врв на појавата. Метеоролошката служба на Обединетото Кралство (UK Met Office) потврди дека тековниот настан ги надминал сите претходно забележани епизоди на „Ел Нињо“ во рамките на достапните податоци од набљудувањата.
Затоа, научниците го опишуваат како исклучително силен настан, а во медиумите веќе се користи терминот „супер Ел Нињо“. Иако станува збор за природен климатски феномен, неговите ефекти се одвиваат на планета што веќе се загрева, што потенцијално ги засилува екстремните температури.
Проценката од 451.000 дополнителни смртни случаи се заснова на модели што ја следат врската помеѓу температурата и смртноста во 24.378 региони ширум светот. Овие податоци беа комбинирани со температурните прогнози поврзани со „Ел Нињо“, при што како референтна вредност беше земен просечниот број на смртни случаи предизвикани од горештини во периодот од 1996 до 2025 година. Самиот извештај допрва треба да помине низ процес на научна рецензија.
Најголем број дополнителни смртни случаи во текот на следните шест месеци се очекува во тропските земји. Меѓу најтешко погодените се Нигерија, Индонезија, Судан, Индија и Бразил. Соединетите Американски Држави исто така се рангирани меѓу 20-те најранливи земји, со проценети 3.500 дополнителни смртни случаи поврзани со горештините. Регионот Сахел и Југоисточна Азија, исто така, ќе бидат особено изложени на ризик.
„Проценката од 451.000 луѓе е толку голема бројка што може да изгледа апстрактно, но таа опфаќа родители и деца, баби и дедовци, соседи и луѓе кои одат на работа, се грижат за своите семејства и ги живеат своите животи“, изјави професорот Мајкл Гринстоун, коосновач на „Climate Impact Lab“ и еден од авторите на извештајот.
Извештајот сè уште не поминал низ процес на рецензија од експерти во областа, но Гринстоун смета дека, со оглед на сериозноста на ситуацијата, авторите не можеле да си дозволат да чекаат.
Научниците исто така го гледаат овој Ел Нињо како предупредување за тоа што може да донесе иднината. Тие проценуваат дека температурите што моментално се јавуваат за време на овој екстремен настан одговараат на нивоа кои – доколку не дојде до дополнителни промени – би можеле да станат норма за околу 20 години.
