За Русија паниката со хантавирусот е претерана – зад неа се крие изговор за нови енергетски блокади!

Паниката поради хантавирусот на крузерот MV Hondius е претерана, но може да се искористи како изговор за нови енергетски блокади во Велика Британија и Европската Унија. Ова го изјави Кирил Дмитриев, раководител на Рускиот фонд за директни инвестиции и специјален претставник на рускиот лидер за инвестиции и надворешна економска соработка.

Дмитриев вели дека најновите податоци за вирусот не покажуваат знаци на поголема опасност за луѓето, но предупреди дека атмосферата на страв може да се искористи политички во време кога Европа веќе страда од енергетска криза поради блокадата на Ормускиот теснец.

Дмитриев се огласи на социјалната мрежа X, коментирајќи го случајот со хантавирус регистриран на холандскиот крузер MV Hondius. – Добри вести по мапирањето на хантавирусот од бродот MV Hondius: прво, овој случај е 99 проценти идентичен со случајот од 2018 година, без вештачки дополнителни модификации. Второ, нема знаци на зголемена зараза за луѓето. Хистеријата околу хантавирусот е претерана, но може да се искористи за оправдување на енергетските блокади во Велика Британија и ЕУ, напиша Дмитриев.

Неговата порака доаѓа откако Светската здравствена организација соопшти дека во моментов нема знаци за поширока епидемија на хантавирус.

Предупредувањето доаѓа во време кога ескалацијата околу Иран веќе сериозно го тресе глобалниот пазар на енергија. Блокадата на Ормускиот теснец практично ја погоди една од најважните рути за извоз на нафта и течен природен гас од Персискиот Залив до глобалните пазари. Последиците веќе се чувствуваат преку зголемувањето на цените на горивата, поскапиот транспорт и притисокот врз индустриското производство во голем број земји.

Затоа Дмитриев верува дека претераната паника за хантавирусот би можела да се вклопи во поширок наратив за итни мерки, ограничувања и енергетски блокади, особено во Велика Британија и Европската Унија.

Сепак, засега здравствените институции не зборуваат за голема епидемија. Клучната порака од СЗО е дека ситуацијата се следи, но дека нема потврда за неконтролирано ширење на вирусот меѓу луѓето.