Вучиќ: Заеднички кум со Орбан ни е слободата! Ќе ѝ подадеме рака на Унгарија, но нема да толерираме понижување

Српскиот претседател Александар Вучиќ изјави дека со унгарскиот премиер во заминување, Виктор Орбан, соработувал на воспоставување искрени односи и разбирање меѓу Белград и Будимпешта, кои „не се лесни за уништување“, но рече дека ќе ѝ подаде рака на новата унгарска влада.

Вучиќ на Х му честиташе на Петер Маѓар за победата, а воедно му се заблагодари и на Орбан, кого на сите јавни настапи го нарекуваше свој пријател.

„Му честитам на Петер Маѓар за изборната победа. Верувам во продолжувањето на добрата соработка меѓу Унгарија и Србија и сум му благодарен на Виктор Орбан што ги овозможи таквите односи“, напиша кратко Вучиќ.

Зборувајќи за Орбан, тој рече „дојдовме до вистинско разбирање меѓу нас и не мислам дека тоа не е лесно да се урне“.

Појавувајќи се на програмата на националната телевизија (РТС) во понеделник вечерта, тој изрази увереност дека проектите што ги започнаа Унгарија и Србија, како што е изградбата на нафтовод, ќе преживеат.

Еден од проектите што ги најавија Вучиќ и Орбан е изградбата на брзата железница Белград-Будимпешта, но реализацијата на овој инфраструктурен проект доцни.

Кога беше прашан за изјавата на Петер Маѓар дека може да претпостави кој „кумува“ на неговото големо пријателство со Орбан, како и на пријателството со словачкиот премиер Роберт Фицо, Вучиќ одговори дека тие имаат заеднички кум, но дека тоа не е рускиот претседател Владимир Путин.

Нашиот заеднички кум е слободата – слободата на мислата и дејствувањето и дека ја сакаме нашата земја повеќе од кој било друг на земјата, тврди Вучиќ и додае дека Србија ќе им подаде рака и на Унгарците и на унгарската влада, но нема да толерира никакво понижување.

Зборувајќи за Унгарија, Вучиќ рече дека се знае кој е неговиот пријател и дека не се откажува од пријателите, „ни во добро, ниту во зло“, нарекувајќи го Орбан „господин“ кој му честиташе на победникот веднаш по поразот на изборите.

Српскиот претседател е убеден дека преговорите за продажба на мнозинскиот руски удел во Нафтената индустрија на Србија (НИС) на унгарскиот МОЛ ќе продолжат.