Српскиот претседател Александар Вучиќ во писмо до генералниот секретар на НАТО, Марк Руте, побара мостот преку реката Ибар во Косово помеѓу северниот дел на Митровица, кој е претежно населен со Срби, и јужниот дел, кој е претежно албански, да не биде отворен за сообраќај.
Во писмото, Вучиќ ја повика меѓународната заедница да преземе чекори за да се осигури дека Приштина ги спроведува клучните одредби од Бриселскиот договор од 2013 година, како и претставниците на КФОР да го запрат прогонот и апсењата на Србите во Косово, во согласност со Резолуцијата 1244 на Обединетите нации.
„Во последните пет години, имаше континуиран прогон и терор врз српскиот народ во Косово, цело време со премолчен или добронамерен став на она што еуфемистички го нарекуваме меѓународна заедница“, напиша Вучиќ на Инстаграм.
Мисијата на НАТО во Косово (КФОР) минатата недела објави дека започнала постепено повлекување од мостот преку реката Ибар помеѓу северниот и јужниот дел на Митровица, кој е симбол на поделба веќе 27 години.
Косово и Србија постигнаа договор за отворање на мостот на реката Ибар во 2014 година, како дел од дијалогот што го водат под покровителство на Европската Унија, но мостот, во кој беа инвестирани 1,5 милиони евра, никогаш не беше отворен за возила.
